Шавкат Мирзиёев Пекинда Хитойнинг CITIC корпорацияси раҳбари Си Гохуа билан учрашув ўтказди, деб хабар бермоқда президент матбуот хизмати.
Учрашувда қўшма лойиҳалар портфелини кенгайтириш масалалари кўриб чиқилди, бунда асосий эътибор Ўзбекистон йўл-транспорт ва муҳандислик инфратузилмасига, ирригация тизимларини модернизация қилишга қаратилди.
Ўзбекистон президенти CITIC корпорацияси билан ҳамкорликни кенгайтириш муҳимлигини қайд этди.
Хитой мулкни бошқариш бўйича халқаро инвестиция корпорацияси молиявий хизматлар кўрсатувчи ҳамда йирик саноат ва инфратузилма лойиҳаларини амалга оширувчи етакчи компаниядир. Унинг активлари қарийб 1,5 триллион долларни ташкил этади.
Шавкат Мирзиёевнинг Хитойга давлат ташрифи тафсилотлари
Ўзбекистон президенти олий даражадаги музокаралар ва қатор икки томонлама учрашувлар ўтказиш учун 23 январь куни Хитойга етиб борди. Президент Хитойга давлат ташрифини мамлакат бош вазири билан учрашувдан бошлади. 24 январь куни бўлиб ўтган учрашувда кўп қиррали амалий ҳамкорликни, энг аввало, савдо-иқтисодий соҳани янада кенгайтириш масалалари кўриб чиқилди.
Шундан сўнг президент Халқ сиёсий маслаҳат кенгаши Бутунхитой қўмитаси раиси Чжао Лесзи билан учрашди. Учрашувда Ўзбекистон техник йўналишлар бўйича мутахассислар тайёрлаш марказларини ташкил этиш, Хитойнинг ижтимоий ҳимоя ва суғурта, аҳолига манзилли ёрдам кўрсатиш борасидаги тажрибасини ўрганишдан манфаатдор экани таъкидланди.
Давлат раҳбари ташриф давомида Пекиндаги Халқ қаҳрамонлари ёдгорлиги пойига гулчамбар қўйиб, Хитой халқининг қаҳрамонлари хотирасига ҳурмат бажо келтирди.
Шавкат Мирзиёев Хитойга давлат ташрифининг ишбилармонлик тадбирлари доирасида Осиё инфратузилмавий инвестициялар банки бош қароргоҳига ташриф буюриб, банк президенти Сзин Лицюн билан музокара ўтказди. Ўзбекистонда олиб борилаётган таркибий ислоҳотлар доирасида устувор йўналишлардаги лойиҳаларни амалга ошириш бўйича 2026 йилгача мўлжалланган қўшма ҳамкорлик дастури қабул қилинди.
Ташриф давомида президент CNPC нефть-газ корпорацияси раиси Дай Хоулянни қабул қилиб, Ўзбекистонда ерости газ сақлаш сиғимларини барпо этиш ва газ етказиш тизимларини модернизация қилиш, замонавий бурғилаш технологияларини жорий қилиш ва нефть-газ тармоғи учун мутахассислар тайёрлаш бўйича истиқболли лойиҳаларни амалга ошириш масалаларини муҳокама қилди.
Изоҳ (0)