Пекинда машҳур “Лазги. Муҳаббат ва қалб рақси” балет спектакли намойиши бўлиб ўтди. Бу ҳақда президент ёрдамчиси Саида Мирзиёева маълум қилди.
Қайд этилишича, ушбу премьера Хитой миллий опера театри саҳнасида Ўзбекистон Маданият ва санъатни ривожлантириш жамғармаси кўмагида ташкил этилган.
Уч йиллик гастрол сафарлари давомида “Лазги. Муҳаббат ва қалб рақси” спектакли Дубай, Истанбул, Бурса, Дортмунд, Москва, Париж ва Санкт-Петербургда томошабинлар олқишига сазовор бўлган.
“Хореограф Раимондо Ребекнинг юксак маҳорати ҳамда Ўзбекистон Миллий балети труппасининг ҳиссиётларга бой ижроси сабабли қадимги рақс янги талқинда ёғду сочди.
Хоразм заминида минг йиллар давомида қадр топган лазги рақси халқ ижодкорлигининг чексиз имкониятидан ҳикоя қилувчи ўзига хос достондир. Лазги – ижрочининг ҳар бир ҳаракати, ҳар бир имо-ишораси, ўтли нигоҳи ўзбек маданиятининг бой тарихи ва бемисл гўзаллигига, қолаверса, аждодларга эҳтиром тимсоли сифатида намоён бўладиган лаҳзалардир”, — деб ёзади Мирзиёева.
Пекинда намойиш этилган спектакл Хитойда Ўзбекистон маданияти кунлари доирасида тақдим этилган. Президент ёрдамчиси юқори даражада ташкил этилган ушбу бадиий байрам учун чуқур миннатдорлигини билдирган.
Айни вақтда президент Шавкат Мирзиёев рафиқаси билан бирга давлат ташрифи билан Хитой бўлиб турибди. Бугун давлат раҳбари ХХР Давлат кенгаши бош вазири Ли Сян билан ҳамда Бутунхитой қўмитаси раиси билан учрашув ўтказди.
Изоҳ (0)