Британияда ҳарбийлар синов давомида биринчи марта DragonFire узоқ масофали лазер йўналтирилган энергетик қурол тизимидан фойдаланган ҳолда ҳаво нишонларини уришга муваффақ бўлди, деб хабар бермоқда мамлакат Мудофаа вазирлиги.
Синовлар Шотландиядаги Ҳебрид полигонида бўлиб ўтди. DragonFire лазерининг диапазони махфийлаштирилган, дейилади Британия ҳукумати баёнотида. Қўшимча қилинишича, қурол “ҳар қандай кўринишга эга нишонни” аниқ мўлжалга олишга қодир. Тhe Times нашрининг ёзишича, синов давомида DragonFire бир неча километр масофадан яқинлашиб келаётган дронларни йўқ қилган.
Британия Мудофаа вазирлиги янги қурол келажакда “муайян вазифаларни” бажариш учун ракеталарга арзон муқобил вариант бўлиши мумкинлигини таъкидлади.
“Энергия қуроллари нишонларга ёруғлик тезлигида тегади ва уларни нур ёрдамида йўқ қилади”, — деб изоҳланган мажмуанинг ишлаш тамойили.
Бир лазер зарбаси 10 фунт стерлинг туради, дея маълум қилди идора. Унинг аниқлиги бир километр масофадан тангани хатосиз уриш билан тенг.
“Муваффақиятли синовлар тегишли масофаларда ҳаво нишонларини мўлжалга олиш қобилиятини намойиш этди ва бу ушбу технологияни жорий этиш йўлидаги муҳим қадамдир”, — дея маълум қилди Мудофаа вазирлиги.
Идора баёнотида айтилишича, Британия армияси ва денгиз флоти ушбу қуролдан ҳаво мудофааси учун фойдаланиш имкониятини кўриб чиқмоқда.
Изоҳ (0)