Судьялар олий кенгаши ахборот хизмати раҳбари Турсунали Акбаров 2023 йилда мустақил судлар фаолиятига аралашганларга нисбатан Судьялар олий кенгаши раисининг прокуратура органларига киритган тақдимномаси натижасида 2 та жиноят иши қўзғатилганини маълум қилди. Бу ҳақда бугун, 18 январь куни Судьялар олий мактабида ташкил этилган давра суҳбатида сўз борди, дея хабар берди “Дарё” журналисти.
Мулоқотда Тошкент шаҳар суди раиси Эркин Хўжақулов ва Маъмурий суд раиси Улуғбек Алмамедовлар журналист ҳамда блогерларни қизиқтирган саволларга жавоб берди.
“Дарё” журналисти суҳбат давомида масъулларга юзланиб, судьяларнинг Халқ депутатлари маҳаллий кенгашига ҳисобот бериш амалиёти (эндиликда судлар брифинг шаклида жамоатчиликка ахборот бериши таклиф қилинмоқда — таҳририят изоҳи) судлар фаолиятига аралашувлар бўлган ёки бўлмагани билан қизиқиб, “Жамоатчилик орасида судлар фаолиятига аралашишлар кўплиги, куч ишлатар тизим ходимларининг судья ишига аралашуви мавжудлиги хусусида гап юради. Айтингчи, бу қанчалик рост?” — дея савол берди.
Мазкур саволга жавоб берган Тошкент шаҳар Маъмурий суди раиси Улуғбек Алмамедов суд раислари маҳаллий кенгашга ҳисобот эмас, ахборот беришини айтиб, “Бизда маҳаллий ҳокимликлар томонидан ёки ҳуқуқни муҳофаза қилувчи идоралар томонидан бирор-бир таъсир ёки ҳолат учрамаган”, деб жавоб қайтарди. Судьялар олий кенгаши ахборот хизмати раҳбари Турсунали Акбаров эса бу жавобдан фарқли маълумот берди.
Суд ишларига аралашувлар бўйича 2023 йилда кенгаш раиси томонидан Бош прокуратурага киритилган 6 та тақдимнома натижасида 3 та ҳолат бўйича маъмурий ҳуқуқбузарликка оид иш қўзғатилган бўлса, 2 та ҳолат бўйича жиноий иш қўзғатилган. Битта ҳолат ўрганилмоқда, — дейди судьялар фаолиятига аралашувлар бўлганини инкор этмаган Турсунали Акбаров.
Судьялар олий кенгаши ахборот хизмати раҳбарининг билдиришича, суд раисларининг маҳаллий кенгашларга ахборот бериши маҳаллий кенгашлар томонидан қарор қабул қилиниб, судларга ёки суд раисларига муайян вазифалар юклаш ҳолатларига олиб келган. Шунингдек, судьяларга “Прокурорнинг сангсия бериш ҳақидаги илтимосномасини нима учун рад қилгансиз?” деган мазмундаги саволлар берилишига йўл қўйиб берган.
Суд раиси маҳаллий кенгашларга ахборот беради. Ахборот берганидан кейин депутатлар йиғилишида суд раисига аниқ ишлар бўйича саволлар кўпайган. “Бу иш бўйича нима учун бундай ҳукм чиқаргансиз?”, “Нега бундай қарор чиқаргансиз?”, “Прокурорнинг сангсия бериш ҳақидаги илтимосномасини нима учун рад қилгансиз?”, деган саволлар кўпайиб кетди. Ҳолбуки, янги таҳрирдаги конституцияда судья муайян ишлар бўйича ҳисобдор эмаслиги алоҳида қайд этиб қўйилган. Янги конституциявий нормадан келиб чиқиб ҳам суд раисларининг маҳаллий кенгаш депутатларига ахборот бериш амалиёти бекор қилиняпти, — дейди у.
Масъулнинг қўшимча қилишича, 2022 йилда Судьялар олий кенгаши раиси тақдимномасига асосан маҳаллий кенгашларнинг судларга, суд раисларига турли вазифалар юклаш ҳақидаги 14 та, 2023 йилда эса 11 та қарори бекор қилинган.
Изоҳ (0)