Қозоғистонда кимларга юқори маош тўланиши маълум бўлди. Бу ҳақда Меҳнат ва аҳолини ижтимоий муҳофаза қилиш вазирлигига таяниб, Tengrinews хабар берди.
Электрон меҳнат биржаси маълумотларига кўра, энг юқори маош саноатнинг бош технологларига — 954 минг тенгедан (2 минг доллардан ортиқ), қудуқларга хизмат кўрсатиш муҳандисларига – 800 минг тенгедан (1700 доллардан ортиқ) ва архитекторларга – 700 минг тенгедан (1500 доллардан юқори) тўланади.
Бу маълумотлар фуқароларнинг эълон қилган резюмелари ва уларнинг кутилаётган иш ҳақи бўйича тахминлари асосида тузилган.
“Ўтган йил давомида режиссёрлар ва видеооператорлар учун юқори маош таклиф қилинган эди. Малакаси бўлмаган одамлар учун иш ҳақи таклифи камроқ. Умуман олганда, малакасиз ишчилар, ярим малакали ишчилар ва юқори малакали ишчилар каби тоифалар мавжуд. Ҳаммаси таълим даражаси ва кўникмасига боғлиқ. Яна ҳисобга олинадиган нарса тажрибадир”, — деб тушунтирди Меҳнат вазирлиги.
2023 йили Қозоғистонда энг юқори маош тоғ-кон саноатида сменали назоратчиларга таклиф қилинган эди — ўртача 758 минг тенге (салкам 1700 доллар) .
Изоҳ (0)