Қишлоқ хўжалиги вазирлиги фермерлар субсидия олиш ҳуқуқидан вақтинча маҳрум қилингани ҳақида ижтимоий тармоқларда тарқалган хабарга муносабат билдирди.
Тарқалган хабарда фермер хўжаликларининг насос агрегатлари ва суғориш қудуқлари истеъмол қиладиган электр энергияси қийматини қоплаш учун бюджетдан субсидиялар ажратиш белгилангани, фермерлар субсидия олиш учун “Агросубсидия” ягона ахборот тизимига ариза топшириши белгиланганига 5 ойдан ошгани, бироқ ҳалигача ариза топшириш имкони йўқлиги айтилган.
Бунга жавобан вазирликнинг билдиришича, Қишлоқ хўжалиги вазирлигининг “Агросубсидия” ахборот тизими орқали 45 турдаги субсидиялар ажратиб келинмоқда. Вазирлар Маҳкамасининг 2023 йил 11 августдаги қарорида ҳам “Агросубсидия” ахборот тизими орқали субсидия ажратилиши ҳам белгилаб берилган. Бироқ мазкур субсидияни ажратиш механизми ва тартибини такомиллаштириш бўйича бир мунча эҳтиёж мавжуд.
Президентнинг “Қуйи бўғинда сув ресурсларини бошқариш тизимини такомиллаштириш ҳамда сув ресурсларидан фойдаланиш самарадорлигини ошириш чора-тадбирлари тўғрисида” 2024 йил 5 январдаги қарорига мувофиқ, 2023 йилда пахта ва ғаллани суғоришга кетган электр харажатлари учун субсидия олмаган фермер хўжаликларига 2024 йил ҳисобидан 100 фоизлик (бунга қадар 2 йилда 50 фоиз ажратилган) субсидия маблағлари ажратилиши белгиланган.
Шу муносабат билан, 2024 йилнинг 15 январидан бошлаб “Агросубсидия” ахборот тизимида такомиллаштирилган механизм асосида фермер хўжаликларининг насос агрегатлари ва суғориш қудуқлари истеъмол қиладиган электр энергияси қийматини қоплаб бериш тартиби жорий этилиши белгиланган.
Изоҳ (0)