Тошкент шаҳар ИИББ пойтахтдаги дўконларнинг бирида бепул тарқатилган кийим-кечаклар сабаб содир бўлган тартибсизликлар юзасидан маълумот берди.
Маълум қилинишича, 4 январь куни Юнусобод туманида жойлашган савдо дўконларидан бири эркаклар учун 300 дона қишки пальтони бепул тарқатишни режалаштирган ва бу хабар “Текинга пальто 300 дона” деб номланган сарлавҳа билан ижтимоий тармоқларда жойлаштирилган. Натижада кўплаб фуқаролар ушбу дўконга ташриф буюрган ва дўкон олдида тартибсизликлар юзага келган. Шу ҳудудда хизмат олиб борувчи ички ишлар органлари ходимлари аралашуви билан жамоат тартиби сақланиб, вазият назоратга олинган, ҳеч ким жароҳатланмаган.
Ҳолат юзасидан Юнусобод тумани ИИО ФМБ томонидан ўтказилган текширув натижасида савдо дўкони раҳбари 25 ёшли С.И.га Маъмурий жавобгарлик тўғрисидаги кодекснинг 200-1-моддасига (оммавий тадбирлар ўтказиш қоидаларини бузиш) асосан, ушбу дўконнинг 9 нафар ишчисига Маъмурий жавобгарлик тўғрисидаги кодекснинг 194-моддасига (Ички ишлар органлари ходимининг қонуний талабларини бажармаслик) асосан маъмурий баённома расмийлаштирилган.
Тўпланган ҳужжатлар жиноят ишлари бўйича Юнусобод тумани судига тақдим этилган. Суд томонидан С.И.га базавий ҳисоблаш миқдорининг ўн беш баравари миқдорида (5,1 миллион сўм) жарима жазоси тайинланган, 9 нафар фуқароларга базавий ҳисоблаш миқдорининг ўн баравари миқдорида (3,4 миллион сўм) жарима жазоси тайинланган.
Эслатиб ўтамиз, 2022 йил апрелда Atlas савдо мажмуасида маиший техникалар учун 70 фоиз чегирма бўлаётгани ҳақида хабарлар тарқалганди. Натижада кўплаб фуқаролар ушбу савдо мажмуасида тўпланган ва кўп ўтмай мазкур дўкон ёпилган эди.
Изоҳ (0)