Андижон вилоятида эҳтиёт чораси сифатида қамоққа олинган шахсни пул эвазига озодликка чиқариб беришни ваъда қилган шахс қўлга олинди, деб хабар беради Бош прокуратура ҳузуридаги департамент.
Маълум қилинишича, департаментнинг Андижон вилоят бошқармаси томонидан тезкор тадбир ўтказилган. Тадбирда муқаддам товламачилик ва бошқа жиноятлари учун судланган Ш.А. фуқаро Ф.С.нинг ишончига кириб, гўёки ўзини муқаддам ички ишлар органларида ишлаганини айтиб, эҳтиёт чораси сифатида қамоққа олинган ўғли А.С.га нисбатан жиноят ишини судда кўриш жараёнида танишлари ёрдамида озодликка чиқариб бериши эвазига 200 долларни фирибгарлик йўли билан қўлга киритгани аниқланган. У яна 1 000 долларни олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Эслатиб ўтамиз, 2022 йил март ойида Андижонда қамоқдаги ўғлини чиқариб бериш учун онасидан 3 минг доллар олган шахснинг ўзи қамоққа олингани тўғрисида хабар берилганди.
Изоҳ (0)