Ўзбекистоннинг Варшавадаги элчихонасида ушбу давлатда тадбиркорлик фаолияти билан шуғулланаётган ватандошлар билан учрашув бўлиб ўтди. Бу ҳақда “Дунё” агентлиги хабар берди.
Қайд этилишича, учрашувда Польшада тадбиркорлик билан шуғулланаётган қатор таниқли банклар, IT-компанияларда ишлаётган ватандошлар қатнашган.
Учрашувда сўзга чиқган ватандошлар Ўзбекистон президенти бошчилигида мамлакатда амалга оширилаётган кенг кўламли ислоҳотларда иштирок этишга, замонавий билим ва тажрибаларини она юрт равнақига йўналтиришга тайёр эканликларини билдирган.
Тадбир давомида Ўзбекистон ҳамда Польша ўртасидаги дўстлик ва ҳар томонлама ҳамкорликни ривожлантиришга қўшган ҳиссаси учун “Халқлар дўстлиги” кўкрак нишони билан тақдирланган “Uzinvest Sp. z o.o.” компанияси раҳбари Воҳид Муҳитдиновга мукофотни топшириш маросими бўлиб ўтган.
“Польшадаги дипломатик ваколатхона кўмагида Ўзбекистон тўқимачилик корхоналари 2023 йил ноябрь ойида Варшавада бўлиб ўтган Fast Textile халқаро кўргазмасида иштирок этганидан сўнг 30 миллион доллардан ортиқ экспорт шартномалари имзоланди. Фурсатдан фойдаланиб, бизни ҳар томонлама қўллаб-қувватлаб келаётгани ва ушбу мукофот учун Ўзбекистон раҳбариятига миннатдорлик билдираман”, — дейди Воҳид Муҳитдинов.
Польшадаги “JD MEBLЕ” мебель фабрикаси директори Расулжон Ибрагимов ўз чиқишида мебель ишлаб чиқариш соҳасида олган билим ва тажрибасини Ўзбекистон иқтисодиётини янада ривожлантириш йўлида сафарбар қилишга тайёрлигини билдирган.
“Eletto Sp. z o.o.” компанияси раҳбари Низомиддин Абдуллаев Польша вино бозорини атрофлича таҳлил қилиш, талаб юқори бўлган тақдирда ушбу мамлакатда вино сотиш бўйича миллий савдо уйини очиш ва реклама компанияларини ташкил этиш режаларини маълум қилган.
Учрашув доирасида Польшадаги Ўзбекистон тадбиркорлари ассоциациясини ташкил этиш тўғрисида келишиб олинган. Шунингдек, ассоциациянинг биринчи йиғилиши ўтказилган. Йиғилиш иштирокчилари Низомиддин Абдуллаевни мазкур ташкилот раҳбари сифатида тасдиқлаган.
Изоҳ (0)