Европа Суперлигасининг эҳтимолий формати эълон қилинди

Европа Суперлигаси ташкилотчилари турнирнинг эҳтимолий форматини эълон қилди.

Европа Иттифоқи суди 21 декабрь куни Суперлига фойдасига қарор чиқарди ва ФИФА ҳамда УЕФА томонидан лойиҳанинг бошланишига тўсқинлик қилиниши ноқонуний деб топилди. 

Турнирни ташкил этаётган А22 Sports хабарига кўра, турнир очиқ бўлиб, иштирокчиларни танлашда спортдаги эришган ютуқларига қаралади. Бунга параллел равишда клублар Европа футболининг асосини ташкил этадиган миллий чемпионатлардаги иштирокини давом эттиради.

Эркаклар ўртасидаги мусобақа 64 та жамоадан иборат бўлади, аёллар жамоалари эса 32 тани ташкил этади. Учрашувлар ҳафта ўрталарида бўлиб ўтади.

Суперлига учта дивизионни ўз ичига олади — Star, Gold ва Blue — улар ўртасида кўтарилиш ва қуйи лигага тушиш бўлади. Star ва Gold лигаларида 16 тадан жамоа кураш олиб боради, Blue лигада эса миллий чемпионатларидаги натижаларига боғлиқ равишда 32 та клуб иштирок этиши кўзда тутилган. Турнирда доимий иштирокчилар бўлмайди, дея хабар беради Marca. 

Турнир доимий чемпионат ва плей-офф ўйинларидан иборат бўлади. Мунтазам турнирда 8 та жамоадан иборат гуруҳларда икки давра ўтказади — шу тариқа ҳар бир жамоа турнирда камида 14 та ўйин ўтказади. Плей-офф босқичида турнир чемпиони, шунингдек, юқори лигага чиқадиган ёки қуйи дивизионга тушадиган жамоалар аниқланади. 

Европа Суперлигаси 2025/26 йилги мавсумдан ишга туширилиши кутилмоқда. Ҳозирда фақатгина “Реал” ва “Барселона” ушбу лойиҳада бўлиб турибди.