Пентагон раҳбари Ллойд Остин Қизил денгиздаги кемаларни ҳимоя қилиш учун Prosperity Guardian махсус операцияси бошланганини эълон қилди. Бу ҳақда АҚШ Мудофаа вазирлиги матбуот хизматида айтилади.
Остиннинг сўзларига кўра, махсус операциядан мақсад “Яман ҳусийларининг ҳужумлари” фонида Қизил денгизда хавфсиз навигацияни таъминлаш бўлади.
“Ямандаги ҳусийлар томонидан сўнгги пайтларда ўйланмасдан амалга оширилаётган ҳужумлар кучайиши эркин савдо оқимига таҳдид солиб, бегуноҳ денгизчиларни хавф остига қўймоқда ва халқаро қонунларни бузяпти”, — дейилади Пентагон баёнотида.
Остиннинг аниқлик киритишича, операцияда Буюк Британия, Баҳрайн, Канада, Франция, Италия, Нидерландия, Норвегия, Сейшел ороллари ва Испания ҳам иштирок этади.
Эслатиб ўтамиз, бир неча кун олдин Яман ҳусийлари Қизил денгизда бир қанча кемаларга ҳужум қилган эди. Ҳусийлар, шунингдек, АҚШ ҳарбий-денгиз кучлари эсминетига баллистик ракеталарни учирди. Шундан сўнг энг йирик авиаташувчи компания ҳусийлар туфайли Қизил денгиздаги фаолиятини тўхтатди.
Изоҳ (0)