Навоий вилояти мактабгача ва мактаб таълими бошқармаси Навоий шаҳридаги 6-мактаб ўқувчиларининг дарс машғулотларига спорт оёқ кийими кийиб келиши билан боғлиқ ижтимоий тармоқларда тарқалган хабарларга расмий муносабат билдирди.
Ижтимоий тармоқларда тарқалган видеода ўқитувчи ота-оналарга мурожаат қилиб, ўқувчилар мактабга кроссовкада келиши мумкин эмаслигини айтган. “Ҳозир бирор текшириш келиб қолса нима бўлади? Жисмоний тарбия бўладиган бўлса, сумкасига формаси билан пакетчага солиб, олиб келиш керак эди. Тасаввур қилинг — менинг жойимда сиз ўтирибсиз, нима қилган бўлардингиз?” — дейди ўқитувчи видеода.
Бошқарманинг маълум қилишича, “Умумий ўрта таълим муассасасининг такомиллаштирилган намунавий одоб-ахлоқ қоидалари”да ўқувчиларга мактаб ҳудудида ва дарс жараёнлари давомида қўйиладиган талаблар кўрсатиб ўтилган. Унда ўқувчилар таълим муассасасига мактаб уставида белгиланган ўқувчилар либосида келиши кераклиги кўрсатилган.
“Таълим муассасасига кроссовкада келмаслиги керак деган талаб мавжуд эмас”, — дейилади муносабатда.
Шунингдек, Навоий вилоятидаги мактабларда ўқувчилар кийимини тартибга солиш бўйича текширув ишлари олиб борилиши белгиланмаган. 6-мактаб маъмурияти ва ўқитувчилари иштирокида бу борада зарур тушунтириш ишлари олиб борилган.
Эслатиб ўтамиз, 2022 йил сентябрда Тошкент шаҳар Мирзо Улуғбек туманида жойлашган 142-сонли мактабда ички ишлар органлари ходимлари, мактаб маъмурияти ҳамда ўқувчилар ўртасида ўтказилаётган профилактик суҳбат жараёни акс этган видео ва фотосурат тарқалиб, кенг муҳокамаларга сабаб бўлганди.
Изоҳ (0)