Ҳар қандай чекловлар, шу жумладан телефон билан боғлиқ бўлганлари ҳам жудаям муаммоли эмас, аммо бу болаларнинг саломатлиги ва ривожланиши учун муҳимдир. Ота-оналар назоратини ташкил этиш осон иш эмас. Бу боланинг ҳаётини қулай қилиш учун кўпроқ эътибор ва самимий истакни талаб қилади. Шунинг учун ваҳима қилмасадан сабр-тоқат ва меҳр билан ҳаракат қилиш муҳимдир. Агар сиз масалага хотиржамлик билан ёндашсангиз, тўғри мувозанат албатта тикланади.
Очиқчасига гаплашинг
Ҳозирги вазиятни биргаликда муҳокама қилиш орқали ўғлингиз ёки қизингизни смартфонга нима жалб қилишини тушунишга ҳаракат қилинг. Эҳтимол, болада реалликдан узоқлашишнинг яширин сабаблари бордир: булар зерикиш, стресс, ота-оналарнинг эътиборсизлиги ёки тенгдошлари билан низолар бўлиши мумкин.
Қоидалар ўрнатинг
Фарзандингиз билан ҳар куни экран ортида қанча вақт ўтказиш мақсадга мувофиқлиги ҳақида хотиржам келишиб олинг. Қурилмалардан тез-тез фойдаланиш хавфи, бу саломатликка қандай таъсир қилиши ҳақида гаплашинг. Гаджет ўйнаш учун маълум бир вақт ажратинг. Шунингдек, телефон тақиқланган ҳолатларни, масалан, дарс пайтида ёки ётишдан олдин белгилаш ҳам муҳим. Сиз тақиқни оилавий ўйинга айлантиришингиз мумкин. Мисол учун, уйда “гаджетсиз” зоналарни яратинг. Бу ошхона ёки ётоқхона бўлиши мумкин. Тақиқ ҳамма учун — болалар билан бир қаторда катталар учун ҳам амал қилиши шарт.
Фарзандингизнинг интернетдаги фаоллигини кузатиб боринг
Фарзандингиздан телефонида нима қилишини сўранг: у қандай иловалардан фойдаланади, қайси сайтларга киради, қандай маълумотларни қидиради. Хавфсизлик қоидалари ҳақида гапиринг ва боланинг уларга қанчалик риоя қилишини таҳлил қилинг. Интернетда нима қилаётганидан хабардор бўлиш жуда муҳим. Ота-оналар фарзандларига интернетдан нафақат хавфсиз, балки фойдали нарсаларни ўрганишга ёрдам беришлари керак.
Муқобил фаолият турларини таклиф қилинг
Агар ўғлингиз ёки қизингиз гаджетга жуда қаттиқ боғланган бўлса, уларга бошқа қизиқишларни топинг. Муқобил вариантни таклиф қилинг - очиқ ҳаводаги ўйинлар, спорт, китоб ўқиш, севимли машғулотлар ёки дўстларингиз ёки оилангиз даврасида шунчаки қизиқарли вақт ўтказиш. Бола ҳар доим виртуал дўстидан кўра ота-онаси, ака-ука ёки опа-сингиллари билан жонли мулоқот қилишни афзал кўради. Аммо бизда бунинг учун ҳар доим ҳам бўш вақт ва хоҳиш бўлмайди. Бундай ҳолларда фарзандингиз учун муҳим нарсани қурбон қилиш қобилиятингизга боғлиқ — бўш вақтингиз, севимли телесериалингиз, тиғиз иш жадвалингиздан ортиб, уларга вақт ажратинг.
Технологик “ойна” яратинг
Гаджетларни бутунлай тақиқлаш ўрнига фарзандингиз телефон ёки интернетда бемалол вақт ўтказиши мумкин бўлган кун тартибида маълум интервалларни яратинг. Масалан, 30 дақиқа вақт ажратинг. Уй вазифасини бажарганидан сўнг ёки тушликдан кейин видео томоша қилиш, севимли ўйинларини ўйнаш ва ижтимоий тармоқларда суҳбатлашиш имконини беринг.
Ўзингиз ўрнак бўлинг
Агар ота-оналар доимий равишда интернетда ишласа ёки телефонфдан бўшамаса, болада ҳам худди шундай одат пайдо бўлади. Ўзингиз фаол ҳаёт тарзини олиб боришга ҳаракат қилинг ва электрон қурилмалардан фойдаланишни чекланг. Болаларга дам олиш ва бўш вақтни ўтказишнинг бошқа усуллари мавжудлигини, ижтимоий алоқалар ва ҳақиқий дунёда жонли мулоқот жуда муҳимлигини кўрсатинг. Шахсий ўрнак - энг самарали далил, энг яхши ёрдам.
Уй ҳайвони боқинг
Бу самарали, аммо жуда муаммоли усул. Аввало болаларга уй ҳайвонлари ўйинчоқ эмас, балки катта масъулият эканлигини тушунтириш керак. Чунки бу усул фақат уй ҳайвонини парвариш қилиш болага ишониб топширилган тақдирдагина ишлайди. У уй ҳайвонини боқиши керак, агар керак бўлса, у билан сайр қилиши, унга қараши ва ғамхўрлик қилиши керак. Бу нафақат унда масъулият ҳиссини уйғотишга, балки ижтимоийлашишга ҳам ёрдам беради. Фарзандингизнинг кичик дўстига ғамхўрлик қилиш қобилиятига шубҳа қилсангиз, дўстларингиздан уй ҳайвонини вақтинчаликка олиб туринг ва у масъулиятга қандай муносабатда бўлишини кузатинг.
Изоҳ (0)