Биографик фильмлардаги персонажини қойилмақом тарзда ижро этган актёр ва актрисалар. Уларнинг баъзиларини ҳақиқий прототиплардан ажратиш ҳам қийин

Ҳар йили таниқли режиссёрлар ҳар хил биографик фильмлар билан томошабинларни хурсанд қилишади. Уларнинг аксарияти сенсация яратади, чунки бош ролларни одатда жуда истеъдодли актёрлар ижро этади. Улар нафақат керакли образни синчковлик билан ижро этади, балки уларнинг баъзиларини ҳақиқий прототиплардан ажратиш ҳам қийин бўлади.

Эль Феннинг — Екатерина II (“Буюк”)

 

 

“Буюк” фильмининг премьераси 2020 йилда бўлиб ўтди. Гарчи сюжет тарихий жиҳатдан тўғри деб даъво қилинмаса ҳам сериал жуда машҳур бўлиб, уч фасл давом этди.

Бош ролни 22 ёшли Эль Феннинг ижро этган. Ижроси учун актриса нуфузли мукофот ва иккита “Олтин глобус” номинациясига сазовор бўлди. “Ушбу ролни ўйнаб, ўзимнинг янги қирраларимни кашф этдим. Мен бутун суратга олиш гуруҳи билан фахрланаман”, — дейди Эль.

Энтони Ҳопкинс — Зигмунд Фрейд (“Фрейднинг сўнгги сеанси”)

Декабрь ойида “Фрейднинг сўнгги сеанси” фильми намойиш этилади, унда “Нарния йилномалари” туркум ҳикоялари муаллифи Клайв Стейплз Льюис ва Зигмунд Фрейд ўртасидаги хаёлий учрашув ҳақида сўз боради. Машҳур психолог ролини Голливуд актёри Энтони Ҳопкинс ижро этган. Режиссёрнинг айтишича, Энтони ўзининг ҳаётий тажрибасига таянган ва ўз характерига кўплаб шахсий сифатларни қўшган.

Киллиан Mёрфи — Роберт Оппенгеймер (“Оппенгеймер”)

Биографик триллерда Киллиан ядро бўйича физик олим ролини ўйнайди. Актёр сценарийни қўлга киритиши билан уни бир нафасда ўқиб, ундан мамнун бўлади. Mёрфи ва режиссёр персонажи устида кўп ишлайди, энг майда деталларни ўйлаб кўради. Натижада томошабинлар Киллианнинг ижросини юқори баҳолади ва бу ролни унинг фаолиятидаги энг яхшиси деб аташди.

Марям Узерли — Хуррам султон (“Муҳташам юз йил”)

Марям бу ролни ҳаётидаги қийин даврда ижро этди. Ўша пайтда у севган инсони билан олти йиллик муносабатларини узган, ишсиз ва квартираси учун ижара ҳақини тўлашга пули йўқ эди.

Актриса қайсар султон хоним ролига пухта тайёргарлик кўрган ва тарихга оид китобларни ўқиган. Аммо охирида у қаҳрамонга ўзининг ҳам хусусиятларини беришга қарор қилади. Марям танқидчилар олқишига ва кўплаб мукофотларга сазовор бўлди. Томошабинлар эса унинг ижросини дадил ва самимий деб аташди.

Мег Беллами — Кейт Миддлтон (“Тож”)

“Тож”нинг сўнгги мавсумида ниҳоят ёш Кейт Миддлтон иштирок этади. Томошабинлар талаба қиз ва Уэлс шаҳзодаси ўртасидаги муносабатларнинг бошланишини кўришади.

Кейт ролини 19 ёшли Мег Беллами ижро этган. Актриса ижтимоий тармоқдаги саҳифасида бўлажак Уэлс маликаси ролини ўйнашини эмоционал равишда эълон қилади: “Илтимос, мени чимчилаб қўйинг. Ажойиб актёрлар ва ижодий гуруҳга қўшилиш мен учун шараф. Мен Кейтни муносиб ўйнашга ҳаракат қиламан”.

Тарон Эжертон — Ҳенк Рожерс (“Тетрис”)

2023 йилда суратга олинган биографик триллер — “Тетрис” фильми ҳуқуқларини сотиб олмоқчи бўлган видео ўйинлар компанияси ходими Ҳенк Рожерс ҳақида ҳикоя қилади.

Бош ролни Тарон Эжертон ижро этган. Танқидчилар бу ролни унинг фаолиятидаги энг яхшиси деб билишади. Ҳенкнинг ўзи эса фильмни томоша қилаётганда шунчалик таъсирланганини, бир неча бор кўз ёшларини ушлаб туролмаганини тан олади.

Элизабет Дебики — Малика Диана (“Тож”)

“Тож” фильмининг 5 ва 6-фаслларида малика Диана ролини Элизабет Дебики ижро этган. Интервьюда актриса ўз фикрларини очиқчасига ўртоқлашади: “Мен Диананинг ўғилларига бўлган барча қувонч ва меҳрини кўрсатиш имконига эга бўлдим”.

Тармоқ фойдаланувчилари ҳам 33 ёшли актрисанинг ижроси ҳақида ижобий фикрда. Бир қиз Элизабет ҳамманинг севимли маликасини беғубор тасвирлаганини ёзган.

Майвенн — Жанна (“Жанна Дюбарри”)

Майвенн Лё Беско, яъни оддийгина Майвенн номи билан машҳур бўлиб, нафақат фильмга режиссёрлик қилган, балки унда бош роль — қирол Людовик XV нинг маъшуқаси ролини ҳам ижро этган. Юлдузнинг айтишича, у ўша даврни севиб қолган.

У фильм сценарийсини уч йил давомида ёзган, маълумот тўплаган. Натижада Майвенн ўз қаҳрамони билан жуда кўп ўхшашликларни топади: бир хил темперамент, ҳаётга чанқоқлик, қизиқувчанлик, ҳатто уникига ўхшаш комплексларни ҳам.

Кэйли Спэни — Присцилла Пресли (“Присцилла: Элвис ва мен”)

Элвис Пресли ҳақидаги шов-шувли биографик фильмдан сўнг, унинг рафиқаси Присцилла Пресли хотираларига асосланган София Копполанинг драмаси чиқди. Бош ролни 25 ёшли Кэйли Спэни ижро этган. Суратга олишдан олдин актриса Присцилла билан шахсан телефонда гаплашган ва унга саволлар берган. Кейинчалик тайёр фильмни кўргандан сўнг у Кэйлини мақтаган ҳам.