Самарқанд шаҳрида қарийб 5 миллиард сўмлик истеъмолга яроқсиз алкоголь маҳсулотларини савдога чиқарилишининг олди олинди, деб хабар беради Бош прокуратура ҳузуридаги департамент.
Маълум қилинишича, департаментнинг Самарқанд вилоят бошқармаси томонидан мавжуд тезкор маълумотларга асосан вилоят ИИБ ЖҚБ ва божхона бошқармаси ходимлари ҳамкорлигида истеъмолга яроқсиз алкоголь маҳсулотларини муомалага киритилишининг олдини олиш борасида тезкор қидирув тадбири ўтказилган. Тадбир давомида Тошкент вилояти Паркент туманида фаолият юритувчи “Б.Г.” МЧЖ таъсисчиси М.О. ва унинг шериги Ш.Ж. Самарқанд шаҳри “Мададкор” МФЙ ҳудудида жойлашган уйнинг омборхонасида ҳеч қандай ҳужжатсиз 30 хил турдаги 134 597 дона умумий баҳоси 4 миллиард 945 миллион сўмлик алкоголь маҳсулотини Самарқанд шаҳрида ўтказиш мақсадида сақлаб келгани аниқланиб, ушбу маҳсулотлар ашёвий далил сифатида олинган.
Ўтказилган экспертиза хулосаларига кўра, ушбу алкоголь маҳсулотларининг акциз маркалари қалбакилиги ҳамда истеъмолга яроқсиз экани аниқланган.
Мазкур ҳолатлар юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) ва 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Қорақалпоғистон Республикаси ва Фарғона вилоятида қалбаки акциз маркали алкоголь маҳсулотларини муомалага киритилишининг олди олингани тўғрисида хабар берилганди.
Изоҳ (0)