Ўзбекистонда ўтган 11 ойда йўл ҳаракати қоидаларини бузиш билан боғлиқ ижро ҳужжатлари бўйича 722 миллиард сўмлик қарздорлик ундирилди. Бу ҳақда МИБ ахборот хизмати “Дарё”га хабар берди.
Мажбурий ижро бюроси органлари томонидан Ички ишлар вазирлигининг Давлат йўл ҳаракати хавфсизлиги хизмати билан ҳамкорликда йўл ҳаракати қоидалари бузилгани учун қўлланган маъмурий қарорларнинг ижросини таъминлаш борасида тизимли ишлар амалга ошириб келинмоқда. Кўрилган чора-тадбирлар натижасида жорий йилнинг 10 ойида бюро органлари томонидан йўл ҳаракати қоидаларини бузиш билан боғлиқ 643 миллиард сўмлик 1,9 миллионта ҳужжатларнинг ижроси таъминланган. Ўтган 11 ойда йўл ҳаракати қоидаларини бузиш билан боғлиқ ижро ҳужжатлари бўйича 722 миллиард сўмлик қарздорлик ундирилган.
Маълумки, ҳуқуқбузар унга жарима солиш тўғрисидаги қарор топширилган кундан бошлаб 15 кун ичида жарима миқдорининг 50 фоизини, 30 кун ичида 70 фоизини ихтиёрий тўлаган тақдирда, уни жариманинг қолган қисмини тўлашдан озод қилиш амалиёти жорий қилинган. Тўлов интизомини янада мустаҳкамлаш мақсадида Мажбурий ижро бюроси ҳамда Давлат йўл ҳаракати хавфсизлиги хизмати ўртасида қўшма кўрсатма тасдиқланган.
Қўшма кўрсатма ижросини таъминлаш мақсадида, тузилган ишчи гуруҳлар томонидан AutoCоn-SC/М-онлайн ва планшет мосламалари ёрдамида туман (шаҳар) марказий кўчаларида ҳамда ҳудудий йўл-патрул хизмати стационар постларида тадбирлар (рейд) ўтказилиб келинмоқда.
Шу билан бирга, мавжуд қарздорликларни ундиришда маҳаллабай ишлаш тизимидан самарали фойдаланилмоқда. Биргина тадбир бошидан бугунги кунга қадар ҳамкорликда ўтказилган тадбирлар давомида бюро органлари иш юритувидаги 51 321 та ижро ҳужжати бўйича 24,4 миллиард сўмлик қарздорликлар амалда ундирилишига эришилди. Бундан ташқари, жаримани ўз вақтида тўламаган ва тадбир давомида қарздорликни тўлашдан бўйин товлаган шахсларга тегишли 14 614 та транспорт воситаси вақтинчалик сақлаш учун жарима майдонларига жойлаштирилди, қидирувдаги 2 684 та транспорт воситалари топилди.
Шундан тадбир давомида 1477 та транспорт воситаси хатланиб, 95 таси онлайн-аукцион савдоларига чиқарилди. Масалан, қарздор Ш.А.дан 13 та (7,3 миллион сўм) маъмурий жарима ва 1 та (399,2 миллион сўм) кредит қарздорлигини ундириш мақсадида Kia Sportage русумли автотранспорт воситаси хатланиб, E-auksion.uz савдоларига чиқарилди.
Кўплаб маъмурий жарималарни тўламасдан келаётган фуқаролар ИИБ ЙҲХБ ходимлари билан ўтказилган тадбирда аниқланиб, қарздорликларни бартараф этмагани сабабли жарима майдонларига жойлаштирилмоқда. Мисол учун, қарздор А.Р.дан 55 та (26,8 милллион сўм) маъмурий жарималарни ундириш мақсадида Venusia русумли автотранспорт воситаси жарима майдонига қўйилди.
Шунингдек, қарздор С.Ш.дан 18 та (9,5 миллион сўм) маъмурий жарималарни ундириш мақсадида Tracker-2 ҳамда қарздор Ю.О.дан 19 та (29,8 миллион сўм) маъмурий жарималарни ундириш учун Captiva жарима майдонига қўйилди. Қарздор М.Х.дан 9 та (4,5 миллион сўм) маъмурий жарима ва 1 та (224,8 миллион сўм) кредит қарздорлигини ундириш мақсадида транспорт воситаси жарима майдонига қўйилди.
Кўплаб жаримаси бор автомашиналарнинг қарздорлиги ўрганилганда, солиқ ва банклардан олинган кредит маблағларини ҳам қасддан тўланмасдан келинаётгани аниқланган. Мисол учун, бюронинг Учтепа туман бўлими томонидан қарздор Х.Ш.дан маъмурий жарима ундириш ҳақидаги 128 та (59 миллион) ва “Капитал банк” АТБ фойдасига кредит қарздорлигини ундириш ҳақидаги ижро ҳужжати бўйича 200 давлат рақамига эга бўлган Malibu вақтинчалик сақлаш учун жарима майдончасига жойлаштирилди.
Автомашинасини жарима майдонидан олиб чиқиш учун айрим фуқаролар қарздорлигини бартараф этган. Бюронинг Зомин туман бўлими томонидан қарздор корхона раҳбари Ў.Ш.дан 4 та (1,3 миллион) маъмурий жарима ундируви билан боғлиқ ижро ҳужжатлари бўйича Nexia-3 вақтинчалик сақлаш учун жарима майдончасига жойлаштирилди ва ундан 1,3 миллион сўмлик маъмурий жарима ва 11,6 миллион сўмлик солиқ қарздорлиги тўлиқ ундирилди.
Вазирлар Маҳкамасининг 377-сонли қарори ижроси доирасида Тошкент вилоятининг “Чинор” йўл-патрул хизмати стационар постида 2022 йилнинг 1 декабрь кунидан ишга туширилган “яшил” ва “қизил” йўлак тамойили тизимидан ҳам самарали фойдаланиб келинмоқда. Мазкур ЙПХ постида 2022 йилнинг 1 декабрь кунидан жорий йилнинг 1 декабрь кунига қадар бюро органлари иш юритувидаги йўл ҳаракати қоидаларини бузишга оид 4,4 миллиард сўмлик (28 885 та) қарздорликлар ундирилиши таъминланди.
Бу борада тадбирлар изчил давом эттирилмоқда.
Изоҳ (0)