Кино оламида карьера қуриш учун фақат истеъдоднинг ўзи етарли эмас. Баъзи актёрлар битта роль ўйнаб, уни шунчалик яхши ижро этишадики, бошқа барча лойиҳалари омадсизликка учрайди. Мисол учун, Тоби Магуайр ҳали ҳам томошабинлар учун ўргимчак одам бўлиб қолмоқда, гарчи у бошқа фильмларда кўплаб ёрқин ролларни ўйнаган бўлса ҳам.
Эмилия Кларк
Оламшумул машҳурлик актрисага “Тахтлар ўйини” сериалидан кейин келди. Эмилия истеъдодли актриса, у турли хил қаҳрамонларни тасвирлай олади, аммо у иштирокидаги “Тахтлар ўйини”дан кейинги барча йирик фильмлар кассада муваффақиятсизликка учради.
Эмилия яхши ўйнаган бўлса-да, “Терминатор Генезис” фильми ҳам омадсизликка учради. Кейинчалик Кларк продюсерлар фильм давомини суратга олмасликка қарор қилганда, енгил тортганини тан олади.
Танқидчилар “Хан Соло: юлдузлар жанги” фильми актёрларини юқори баҳолашди. лекин зерикарли ва саёз сценарий учун фильм ижодкорлари танқид қилинди. Натижада бу фильм ҳам муваффақиятли чиқмади. Афтидан, Дейнерис роли ҳозирча актриса фильмографиясидаги энг муҳими бўлиб қолмоқда.
Эмма Уотсон
Актрисаликни ёшлигидан бошлаган ва узоқ давом этган франшизаларда роль ўйнаган кўплаб актёрлар сингари Эмма ҳам ўзининг энг машҳур ролининг асирига айланиб қолди. Уотсон юқори даражадаги лойиҳаларга таклиф қилинади, кўплаб танқидчилар унинг ишини эътироф этади, аммо томошабинлар унинг бошқа образларига ўрганолмайди.
Мина Сувари
2000 йилларнинг бошларида Мина том маънода экранлардан тушмади. У бир нечта муваффақиятли фильмларда, жумладан “Америкача гўзаллик” фильмида роль ўйнаган. Кўпгина томошабинлар ҳали ҳам актрисани ушбу фильм билан боғлашади.
Кейинги йилларда Сувари қаергадир ғойиб бўлгандек туюлиши мумкин, лекин актриса фильмларда суратга тушишдан тўхтамади. Шунчаки кейинги бирорта ҳам фильми катта муваффақиятга эриша олмади.
Тоби Магуайр
Актёр комедик ролларни ҳам, драматик ролларни ҳам маҳорат билан ижро этади. Унинг тўпламида жуда кўп машҳур фильмлар бор, лекин кўпчилик томошабинлар уни ҳали ҳам “Ўргимчак одам” трилогияси билан боғлашади. Магуайрнинг фильмографиясида “Шоввоз Гэтсби” фильмидаги Ник роли ҳам бор, гарчи унинг ижроси танқидчиларни қониқтирмаган бўлса ҳам.
Баъзилар мазкур фильмда Тобини пайқаш қийинлигини таъкидлайди. Аммо кўпчилик унинг “Пиёдани қурбон қилиб” биографик драмасида Бобби Фишер ролидаги реинкарнациясини ёқтиради, афсуски фильм кассада муваффақиятсизликка учраган.
Кэти Ҳолмс
“Доусон кўрфази” телесериалидаги қўшни қиз роли актрисага дунё миқёсида шуҳрат келтирди. Лойиҳа 6 фаслдан сўнг бекор қилинганида Кетининг номи аллақачон унинг қаҳрамони Жоуи Поттер билан чамбарчас боғлиқ эди. Кети жуда кўп роль ўйнади ва турли жанрдаги фильмларда суратга тушди, лекин бошқа ролларидан ҳеч бири бундай муваффақиятга эришмаган.
Актрисанинг “Бэтмен” фильмидаги чиқиши кўпчиликка ёқмади. Ҳолмс бошқа актёрларга нисбатан зерикарли деб аталди. Танқидчилар унинг “Кеннедилар: Камелотдан сўнг” телесериалидаги ишидан унчалик қониқмаган.
Керри-Энн Мосс
Актриса 80 йиллар охиридан бери фильмларда роль ўйнаган, аммо “Матрица” трилогиясидаги иштироки унга оламшумул шуҳрат келтирди. Тринити роли Мосс учун култ ролга айланди, аммо бошқа лойиҳаларнинг ҳеч бири машҳурликда ушбу фильмга яқинлаша олмади. Ҳатто Керри-Энннинг Marvel лойиҳаларидан бирида иштирок этиши ҳам кўпчиликнинг эътиборидан четда қолиб кетди.
Жош Ҳатчерсон
Актёр “Ҳаёт-мамот ўйинлари” франшизасида Пит Мелларк роли туфайли шуҳрат қозонган. Гарчи бу образ асосий бўлмаса-да, Ҳатчерсон уни жуда ёрқин ва қизиқарли қилишнинг уддасидан чиқди.
Сагадаги сўнгги фильм чиққандан сўнг Ҳатчерсон экранлардан ғойиб бўлгандек бўлди, бу унинг мухлисларини ҳайратда қолдирди. Аслида актёр мустақил фильмларда роль ўйнашни афзал кўрганди.
Яқинда унинг иштирокидаги 2 та йирик фильм экранларга чиқади, Ҳатчерсон оламшумул муваффақиятини такрорлай оладими, йўқми кўрамиз.
Изоҳ (0)