“Ўзбекистон раҳбари Марказий Осиёни янада ривожлантиришнинг ‘оптимал формуласи’ни эълон қилди” — Элдор Арипов

4 декабрь куни БМТнинг Нью-Йоркдаги штаб-квартирасида бўлиб ўтган “Глобал ва минтақавий кун тартибининг долзарб масалалари: Ўзбекистон нуқтаи назари” мавзусидаги брифингда Стратегик ва минтақалараро тадқиқотлар институти (СМТИ) директори Элдор Арипов маъруза қилди.

Брифинг Ўзбекистон президентининг БМТ Бош ассамблеясининг сентябрь ойида бўлиб ўтган 78-сессиясида  қилган чиқиши ва ташаббусларига бағишланди.

“Марказий Осиё минтақасининг айни марказида жойлашган, динамик янгиланаётган Ўзбекистон минтақавий контекстдаги ижобий ўзгаришлар катализаторига айланмоқда.

Ўзбекистон президенти қўшнилар билан муносабатларни яхшилашни ташқи сиёсатнинг асосий устувор йўналиши деб эълон қилар экан, авваллари ҳамкорлигимизга тўсқинлик қилаётган барча масалаларда – чегараларни делимитация ва демаркациядан тортиб, сувдан фойдаланишгача бўлган масалалар бўйича муросавий ечим топишга таянди”, — деди СМТИ директори Элдор Арипов брифингдаги нутқида.

“Ўтмишдаги тажрибамиздан аччиқ хулоса олган ҳолда, зиддиятлар муаммони ҳал қилмаслигини, балки янада оғирлаштиришини англаб, сиёсий иродага таяндик ва ҳақли равишда фахрланадиган натижаларга эришдик”, — деди Арипов.

Унинг сўзларига кўра, авваллари тез-тез тўқнашувлар ва келишмовчиликлар билан тўлиб-тошган, чегаралар ёпиқ, савдо-сотиқнинг музлатилганлиги билан ажралиб турадиган минтақа энди ўзининг салбий меросидан ишонч билан қутуляпти.

Чегара ўтказиш пунктлари очила бошлади, одамлар ўз қариндошлари ва яқинларини кўриш имкониятига эга бўлдилар, савдо-сотиқ, гуманитар алоқалар фаоллашди. Минтақавий ҳамкорлик институтлари ва механизмлари вужудга келди.

“Фақат президент Шавкат Мирзиёев таклиф қилган очиқлик, мулоқот ва ҳамкорлик бу ерга ташқи кучларни конструктив жалб этиш учун шароит яратади, бир томондан, зиддиятлар ва қарама-қаршиликлардан ҳоли, минтақалараро ҳамкорлик ва шериклик маконини шакллантириш учун замин яратади. Бошқа томондан, товар ва хизматлар, инвестициялар ва инновациялар учун кенг бозор очади”, — деди СМТИ директори Элдор Арипов

“Моҳиятига кўра, бу Ўзбекистон раҳбари томонидан таклиф этилган оптимал формула бўлиб, Марказий Осиё давлатларининг ҳам, хорижий ҳамкорларимизнинг ҳам манфаатларига жавоб беради”, – дея қўшимча қилди у.

Унинг фикрича, бу ҳам Марказий Осиёда хавфсизлик ва барқарорликни таъминлашнинг энг муҳим шартига айланиб бормоқда.