Аввалига ғойиб бўлиб, сўнг лавозимидан олинган собиқ Хитой ташқи ишлар вазири тўсатдан вафот этди — Politico

Июль ойида лавозимидан четлаштирилган собиқ Хитой ташқи ишлар вазири Син Ган қийноқлар ёки ўз жонига қасд қилиш оқибатида вафот этди. У мамлакатнинг юқори амалдорлари даволанадиган Пекин ҳарбий госпиталида ҳаётдан кўз юмган. Бу ҳақда Politico юқори мартабали Хитой расмийларига яқин манбаларга таяниб, хабар берди.

Син Ган 25 июнь куни шри-ланкалик ҳамкасби Муҳаммад Али ва Россия ташқи ишлар вазири ўринбосари Андрей Руденко билан учрашганидан сўнг тўсатдан ғойиб бўлганди.

Politico манбаларига кўра, Россия вазири ўринбосари Пекинга ташрифи чоғида Хитой раиси Си Цзиньпинга “ХХР ташқи ишлар вазири ва бир неча юқори мартабали хитойлик ҳарбий офицерлар Ғарб разведка идоралари билан тил бириктиргани” ҳақида хабар берган. Гап ракета қўшинлари бош қўмондони Ли Ючао, унинг ўринбосари Лю Гуанбин, ташқи ишлар вазири Син Ган ва у билан бир вақтда омма кўзидан ғойиб бўлган собиқ ўринбосари Чжан Чженчжун ҳақида кетмоқда. Руденко улар Хитойнинг “ядровий сирларини” Ғарб разведкасига топширганини айтган, деб ёзади Politico.

Нашр хабарига кўра, Хитой раиси юқори мартабали амалдорлар сафини хиёнатда гумон қилинганлардан тозаламоқда. Бу йил яна бир қанча амалдаги ва истеъфодаги юқори мартабали армия зобитлари ҳибсга олинган ва камида битта собиқ қўмондон ўринбосари “ноаниқ касаллик” туфайли вафот этган.

Бундан ташқари, нашрнинг ёзишича, Си Цзиньпин 2012 йилда ҳокимият тепасига келганидан бери юзлаб юқори мартабали армия зобитлари ва минглаб партия амалдорлари ҳибсга олинган, ғойиб бўлган ёки “ўз жонига қасд қилган” — улар ўз жонига қасд қилишга мажбурланган ёки уларнинг қотиллиги ўз жонига қасд қилиш деб топилган.

Аввал The Wall Street Journal Син Ган америкалик маъшуқаси туфайли ишдан бўшатилгани ҳақида хабар берганди.