Психология пул ишлаш манбаига айлантириб юборилмоқда. Бу ҳақда Асаб ва руҳият илмий-тиббий маркази директори, профессор Зарифбой Ибодуллаев “Дарё” нашрига берган қисқача интервьюсида айтиб ўтди.
Психогенетиклар пайдо бўлганмиш. Улар боланинг туғилишига ҳам таъсир қиламиз, ҳаётингизни ҳам, генингизни ҳам ўзгартириб юборамиз, деб ваъдалар беришмоқда экан. Бундай хизмат учун шунақа катта суммаларни қўйишган дейишади, ёқа ушлайсиз.
Бу масалани Соғлиқни сақлаш вазирлигида ҳам кўтаряпмиз, умумий психологлар билан ҳам гаплашдик. Уларни назоратга оладиган тизимни йўлга қўймасак бўлмайди. Баъзи психологлар суҳбатидан кейин оилалар бузилиб кетяпти. “Психолог суҳбатидан кейин аёлим ўзгариб қолди”, деб бизга мурожаатлар билан келишмоқда, — деди профессор.
Олимнинг айтишича, ҳозир чет элда психологик курслар кўпайиб кетган бўлиб, 600 доллар эвазига масофадан ўқиб, диплом олиш мумкин.
Мен масофавий таълимга қарши эмасман, лекин уларда малака йўқ. Ҳаттоки олий таълим тизимида ўқимаган, ишламаган. Ўқиган бўлса ҳам бошқа соҳада ўқиб, пул ишлаш учун шу соҳага кирган. Гапга усталиги, чечанлигидан фойдаланиб, кўплаб аёлларимиз ўзича психолог бўлиб қолишмоқда.
Умуман профессионализм йўқ, психогенетика нималигини, этнопсихологияни ўзи билмайди. Оқибатда оилаларда катта муаммолар пайдо бўлмоқда, — деди Зарифбой Ибодуллаев.
Изоҳ (0)