БМТ Ўзбекистонга ижтимоий ҳимоя соҳасидаги ўзгаришларни амалга оширишда ёрдам бермоқчи. Бу ҳақда президент ҳузуридаги Ижтимоий ҳимоя миллий агентлиги хабар берди.
Маълум қилинишича, 2 декабрь куни Ўзбекистон делегацияси ҳамда БМТ бош котибининг биринчи ўринбосари Амина Муҳаммад ўртасида Ўзбекистонда ижтимоий ҳимоя масалаларига бағишланган муҳим учрашув бўлиб ўтди. Амина Муҳаммад Ижтимоий ҳимоя миллий агентлиги делегацияси вакилларини илиқ қаршилаб, агентлик фаолиятида аёлларнинг ролини юқори баҳолади, бу эса ижтимоий хизматлар сифатини яхшилашга ёрдам беришини таъкидлади.
Учрашув доирасида Ўзбекистон президенти ташаббуси билан 2024 йилда “ижтимоий ҳимоя: барқарор ривожланиш йўли” номли жаҳон конференциясини ўтказиш масалалари юзасидан сўз юритилди.
“Ушбу тадбир БМТнинг 2025 йилги Ижтимоий саммити учун муҳим тайёргарлик платформаси бўлиши мумкин”, — дея қайд этган Амина Муҳаммад.
БМТнинг Ўзбекистонга ижтимоий ҳимоя соҳасидаги ўзгаришларни амалга оширишда ёрдам беришга тайёрлиги таъкидлади. Амина Муҳаммад, шунингдек, БМТ бош котиби ташаббуси билан “Иш ўринларини яратиш ва ижтимоий ҳимоя глобал акселератори” доирасида Ўзбекистон ҳукуматининг ўзаро ҳамкорликдаги ташаббусларини юқори баҳолади.
Музокаралар якунида Амина Муҳаммад учрашув натижаларидан мамнунлигини билдирди ва БМТнинг Ўзбекистонда бўлиб ўтадиган ижтимоий ҳимоя бўйича халқаро конференцияда иштирок этишга қизиқиш билдириб, барқарор ривожланишга эришиш учун ҳамкорликнинг муҳимлигини яна бир бор таъкидлади.
Изоҳ (0)