Тошкент шаҳар ИИББ пойтахтда криминоген вазиятни яхшилаш бўйича кенг қамровли тезкор-профилактик тадбирлар ўтказилаётганини маълум қилди.
Идоранинг маълум қилишича, пойтахт ҳудудида жиноятларни олдини олиш, ҳуқуқбузарликлар профилактикасини кучайтириш ва фуқаролар хавфсизлигини таъминлаш мақсадида, Тошкент шаҳар ИИББ ҳамда ҳуқуқни муҳофаза қилувчи идоралари томонидан криминоген вазиятни яхшилаш бўйича тезкор-профилактик тадбирлар ўтказилмоқда.
“Ҳурматли фуқаролар! Хавфсизлик қоидаларига риоя этишингизни ва хавотирга берилмаслигингизни сўраймиз. Барча ҳаракатлар шаҳримизнинг тинчлик ва осойишталигини таъминлаш мақсадида ўтказилмоқда”, — дейилади хабарда.
Аввалроқ ички ишлар вазири Пўлат Бобожонов тўққиз ярим мингга яқин маҳалланинг 1,5 мингдан зиёдида криминоген вазият мураккаблигича қолаётгани ҳақида айтганди. Май ойида собиқ ички ишлар ходими, Тошкент шаҳрида ЙПХ мансабдори лавозимида ишлаган фуқаро ички ишлар вазири Пўлат Бобожонов қабулида бўлиб, лавозимидан ноҳақ олинганини, унга нисбатан ўтказилган хизмат текшируви адолатсиз бўлганини айтиб, кўмак сўрагани тўғрисида хабар берилган эди.
Изоҳ (0)