“Реал” футболчиси Родриго Гоэс аргентиналик футболчи Лионель Месси билан бўлиб ўтган можарога изоҳ беришни хоҳламади.
ЖЧ—2026 саралаш босқичидан ўрин олган Бразилия — Аргентина (0:1) ўйини Маракана трибуналаридаги тартибсизлар туфайли тахминан 30 дақиқа кечиктирилди. Бу орада “Реал” вингери ва “Интер Майами” юлдузи ўртасида зиддият юзага келди.
Лео ва Родриго де Пол бразилиялик футболчи билан баҳслашаётганда Месси Родригонинг бўйнидан ушлаб олди. Кейинчалик маълум бўлишича, Родриго ўйин кечикиши туфайли кийим алмаштириш хонасига йўл олаётган аргентиналикларга қараб, уларни ҳақорат қилган.
Месси унга: “Жим бўл, болакай”, деб бақирган. Шунингдек, Лео: “Биз жаҳон чемпионимиз. Нега бизни ҳақорат қиляпсан?”, — деган. “Реал” футболчиси Мессига қараб: “Жаҳон чемпиони? Сен қандай қилиб ғолиб бўлганингни барчамиз биламиз”, — деб жавоб берган. Учрашувдан сўнг Родриго ижтимоий тармоқларда ирқчиликка оид ҳақоратларга дучор бўлди.
Родригонинг отаси Эрик Гоэс ўғлини ҳимоя қилиб, Instagram саҳифасига ўғлининг Месси билан можароси, шунингдек, Леонинг Уругвайга қарши баҳсдаги Матиас Оливейра, Мануэл Угартелар билан жанжаллари суратини эълон қилди ва “Бу ҳеч ким билан жанжал қилмайдиган фариштами?”, дея изоҳ қолдирган.
“Наполи”га қарши баҳсдан сўнг “Реал” футболчиси Родригога Месси ҳақида савол берилди.
“Бу ҳақида гапира олмайман, “Мадрид” рухсат бермайди”, — деб жавоб берди бразилиялик футболчи.
Изоҳ (0)