Тошкент шаҳри мисолида автобуснинг енгил транспортга нисбатан самарадорлиги 135 баробарни ташкил этмоқда, деб хабар беради Транспорт вазирлиги матбуот хизмати.
Таҳлилларга кўра, битта енгил автотранспорт воситасида бир кунда ўртача 4,3 та йўловчи, битта автобусда эса ўртача 580 та йўловчи ташилмоқда.
Ўтказилган транспорт макромодели таҳлилларига кўра пойтахтдаги мобил аҳолининг кунлик ҳаракатланиш (қатнов) сони ўртача 9 миллионтани ташкил этиб, шундан 6 миллион қатнов транспортда амалга оширилади. Транспортда амалга оширилаётган қатновларнинг 1,7миллионтаси (28 фоиз) жамоат транспорти, 4,3 миллионтаси енгил автотранспорт ҳиссасига тўғри келмоқда.
Пойтахтнинг транспорт воситалари доимий ҳаракатланадиган асосий 73 та кўчасининг узунлиги 472 километрни ташкил этиб, ўртача 380-400 мингта автотранспорт ҳаракатланишига мўлжалланган.
Ҳозирда шаҳарда кун давомида ўртача 1 миллионга яқин автотранспорт ҳаракатланмоқда. Бу йўлларда бир вақтда ҳаракатланиш сиғимидан 2 баробар кўп.
Август ойида Тошкент шаҳар ИИББ томонидан шаҳарда тиғиз вақтларда юк машиналарининг ҳаракатланишини чеклаш масаласи ўрганилаётгани тўғрисида хабар берилганди. Унга кўра, юк автомобилларининг ҳаракати эрталаб соат 07:00 дан 10:00 гача ва кечки соат 17:00 дан 20:00 гача бўлган вақт оралиғида чекланиши мумкин.
Изоҳ (0)