Россия президенти Владимир Путин мамлакат бошдан кечираётган “энг қийин демографик муаммолар” ҳақида гапирди. Уларни енгиш учун, Путиннинг сўзларига кўра, кўп болали оилалар анъанасини қайта тиклаш зарур. Бу ҳақда у 28 ноябрь куни Бутунжаҳон рус халқи кенгаши йиғилишидаги чиқишида айтди, деб ёзади The Moscow Times.
Путин бир неча авлод олдин рус оилаларида етти-саккиз, ҳатто ундан ҳам кўпроқ фарзанд бўлганини эслади.
Келинг, бу ажойиб анъаналарни қайта тиклайлик. Кўп болали ва катта оилалар Россиянинг барча халқлари учун одатий ҳолга, турмуш тарзига айланиши керак, — дея Путиннинг сўзларидан иқтибос келтиради Кремль матбуот хизмати.
Шу билан бирга, президентнинг сўзларига кўра, демографик муаммоларни фақат пул, нафақа, ижтимоий тўловлар ёрдамида ҳал қилиш “имконсиз”. 2018 йилдан буён амалда бўлган ва бюджетдан 4 триллион рубль сарфлайдиган “Демография” миллий лойиҳаси ҳозирча мамлакатни демографик туйнукдан олиб чиқишга ожизлигини исботлаган.
The Moscow Times маълумотларига кўра, 2023 йилнинг биринчи ярмида Россияда туғилган болалар сони яна 3 фоизга камайиб, 616,2 минг нафарга етган, июнь ойида эса бу кузатувлар тарихидаги энг паст кўрсаткич бўлди – 104,4 минг, бу ўтган йилга нисбатан 6,7 фоизга кам.
Қайд этилишича, Россияда болалар туғилиши Қрим аннексия қилинганидан кейин муттасил қисқариб бормоқда ва шундан сўнг деярли учдан бирга камайди: 2014 йилдаги 1,942 миллиондан 2022 йилда 1,306 миллионгача. Жорий йилнинг охирида, Росстат прогнозига кўра, туғилишлар сони 1,244 миллионга камайиб, 1990 йиллардан бери минимал даражага айланади.
Эслатиб ўтамиз, Британия разведкаси маълумотларига кўра, ноябрь ойи давомида Украинадаги урушда ҳар куни ўртача 931 нафар россиялик ҳалок бўлган.
Изоҳ (0)