Ўзбекистонда 2023 йил 1 декабрдан бошлаб ҳаж зиёратига борувчиларнинг ягона онлайн навбати барча учун очиқ бўлади.
Бу ҳақда “Коррупцияга қарши курашиш тизимини янада такомиллаштириш ҳамда давлат органлари ва ташкилотлари фаолияти устидан жамоатчилик назорати тизими самарадорлигини ошириш чора-тадбирлари тўғрисида”ги президент фармонида белгиланди.
Коррупцияга қарши курашиш агентлиги директори Акмал Бурхоновнинг ёзишича, ҳаж зиёратига боришдаги фирибгарлик ҳолатларининг олдини олиш ва навбатга туриш тизимини очиқ ва шаффоф бўлишини таъминлаш мақсадида ҳаж зиёратига борувчиларнинг ягона онлайн навбати доимий янгилаб борилади ва у барча учун очиқ бўлади.
Фармонга кўра, 2023 йил 1 декабрдан бошлаб қуйидаги маълумотлар ҳам очиқ эълон қилиб борилади:
- болаларни давлат мактабгача таълим ташкилотига қабул қилиш учун берилган аризалар навбати;
- бўш иш ўринлари, ишга қабул қилиш шартлари, номзодларга қўйиладиган талаблар ва тақдим қилиниши лозим бўлган ҳужжатлар;
- нодавлат нотижорат ташкилотларга ажратилган грант ва ижтимоий буюртма лойиҳалари ва бажарган ишлари юзасидан ҳисоботлари.
Бундан бир неча кун аввал Коррупцияга қарши курашиш агентлиги ҳаж тадбирига бориш учун навбатда турган зиёратчиларнинг ягона онлайн навбати тўғрисидаги маълумотларни очиқ эълон қилиниши керак бўлган ижтимоий аҳамиятга молик маълумотлар рўйхатига киритишни таклиф қилганди.
Изоҳ (0)