Санитария-эпидемиологик осойишталик ва жамоат саломатлиги қўмитаси Наманган вилоятида қизамиққа чалинган болалар сони кескин ошиб кетаётгани айтилган хабарларга муносабат билдирди.
Маълум қилинишича, Наманган вилоятида қизамиқ касаллиги билан гумон қилинган беморларни стационар даволаш учун 340 шифо ўрин ташкил этилган бўлиб, бундан 240 таси вилоят юқумли касалликлар шифохонасида, 100 таси вилоятнинг Бешкапа болалар сиҳатгоҳида жойлашган.
Шундан, вилоят юқумли касалликлар шифохонасида 240 ўринда 235 та бемор даволанмоқда, 5 шифо-ўрни захираси мавжуд, Бешкапа болалар сиҳатгоҳида 100 ўринда икки ёшдан юқори беморлардан 20 нафари даволанмоқда, 80 шифо-ўрни захираси мавжуд. Ҳозирги кунда, вилоятда жами 85 шифо-ўрни захираси бор, 285 та бемордан 62 фоизи 1 ёшгача болалар, 25 фоизи 1-3 ёшдаги болалар. Вилоятда диагностикум, реагент ва вакциналарнинг етарли миқдордаги захираси яратилган.
Вилоятга 9500 доза қизамиқ-қизилча вакцинаси берилган бўлиб, жами 1936 нафар бола эпидемиологик кўрсатма асосида қизамиқ касаллигига қарши вакцина билан эмланган. Ҳозирда даволаш профилактика муассасалари эмлаш хоналарида 310 доза қизамиқ-қизилча вакцинаси захираси мавжуд.
2023 йил 10 ойи давомида вилоят бўйича жами 735 та қизамиқ касаллиги лаборатория текширувида тасдиқланган.
Таъкидланишича, ноябрь ойида давлат бюджети ҳисобидан 3 миллион доза қизамиққа қарши вакциналар харид қилинган. Ушбу вакциналар эпид кўрсатма бўйича эмланадиган қатлам, маълум сабабларга кўра эмлашдан қолиб кетган болалар ҳамда хавф гуруҳига кирувчи, қизамиқ касалига чалинган бемор билан мулоқот қилган 6 ойдан 5 ёшгача бўлган болаларни эмлаш учун мўлжалланган ва айни вақтда ҳудудларга тарқатилмоқда.
Изоҳ (0)