2023 йилнинг 3 октябрь куни бўйдоқлик билан хайрлашган таниқли актёр Дилшодбек Каттабеков “Миллий” телеканалининг “Иккаламиз” лойиҳасида рафиқаси Зуҳра билан бирга иштирок этди ҳамда бошловчиларнинг саволларига жавоб берди.
Рафиқаси билан қандай танишган?
— Уйланиш мавзуси уйимизда 4-5 йилдан бери давом этаётган эди. Мендан кейин укам ҳам уйланди. Йиллар ўтган сари инсон инжиқ бўлиб қолар экан. Инсон ўз кўнглига ёққан инсонни топсангизгина, у билан бирга яшаб кета оласиз. Рафиқам ижтимоий тармоқлардан фойдаланмайди. Фақат Telegram мессенжерига рухсат берганман. Учрашувга чиққанимда Зуҳранинг ерга қараб, уялиб ўтириши эътиборимни тортган. Чунки аёл киши эркак киши билан гаплашганида кўзига тик қараб турмаслиги керак. У холаваччамнинг қўшниси, Сирдарёга борганимда 10 дақиқача кўришиб суҳбатлашдик. Бир-биримизга маъқул бўлдик. Қайнонам менинг мухлисим эканликлари қўл келди.
Тўй ҳақида
— Тўй икки ёшнинг ҳаётида энг муҳим нарса эмас. Тўй дабдабали бўлиб, ҳаёт дабдала бўлганидан кўра, у ихчамроқ бўлиб, ҳаётингиз дабдабали бўлсин. Тўй — бу икки-уч соатда ўтадиган нарса. Тўйимда жанжаллар бўлишидан ҳадиксираб ўтирдим. Кейин жуда кўп нотаниш инсонлар келишди. Зуҳрадан “Сенинг қариндошингми?”, десам танимаслигини айтди, уларни мен ҳам ҳеч қачон кўрмаганман. Олдимизга келиб расмга тушиб кетишди.
— Бизнинг оиламизда мен биринчи ўринга ота-онамни қўяман. Агар сен уларни қайнота-қайнонадек эмас, ўз ота-онагдек кўрсанг, бошингда кўтариб юрсанг, мен сени бошимда кўтараман, деганман. Келин ака-ука ўртасига совуқчилик туширмаслиги керак. Майда гапларни ташимаслиги керак. Кетаётганимда яхши кузатиб, келганимда яхши кутволсанг, оиламиз муҳитига кўниксанг, биздан бахтли оила бўлмайди деганман.
Оиласи келажаги ҳақида
— 5-10 йилдан кейин Аллоҳ берган фарзандларимиз қуршовида, ҳамма ҳавас қиладиган даражадаги бахтли оилалар сафида бўлишни орзу қиламан.
Қайнонасининг ўгитлари
— Зуҳранинг онаси билан гаплашганимда улар “Дилшодбек, сизнинг ёшингиз каттароқ. Зуҳрани сизга ишониб топширяпман. Ўзингиз кам-кўстларини ўргатасиз. Зуҳра бизнинг кенжамиз, эркатой фарзандимиз. Шунинг учун биз унга кўп уй юмушларини ҳам қилдирмасдик. Янги уйга борганида унинг қайнота-қайнонаси, қайнакалари, қайинсингиллари бўлади, лекин унинг энг яқин инсони — энди сизсиз”, деганлар.
Дилшодбек Каттабеков, шунингдек, 19 ёшли рафиқаси билан Тошкентга кўчиб келишгани, ҳозирда ота-онасидан алоҳида яшаётганлари ҳақида ҳам гапириб ўтган.
Изоҳ (0)