Ўзбекистонда апельсин, мандарин ҳамда лимон нархи кескин тушиб кетди, деб хабар бермоқда EastFruit портали.
Қайд этилишича, ўтган ҳафта давомида Ўзбекистонда апельсиннинг улгуржи нархи 30 фоизга пасайди. Бу 2023 йилнинг ўтган даврида ушбу маҳсулот нархининг ҳафталик энг катта ўзгариши бўлди. Бундан ташқари, сўнгги икки ҳафтада маҳаллий ишлаб чиқарилган лимон нархи кескин тушиб кетди, мандарин нархи эса кетма-кет тўртинчи ҳафта пастламоқда.
10 ноябрдан 17 ноябргача Ўзбекистонда апельсиннинг ўртача улгуржи нархи 1 килограмм учун 23 минг сўмдан 16 минг сўмга пасайган. Бу меванинг жорий улгуржи нархлари ўтган йил ва 2021 йилнинг шу санасига нисбатан 20 фоизга паст бўлди.
Ўтган ҳафтада мандарин нархи ҳам арзонлашди. 10 ноябрдан 17 ноябргача бу меванинг ўртача улгуржи нархи 20 минг сўмдан 17 минг сўмгача (1,63 доллардан 1,39 долларгача) пасайди. Яъни, бир ҳафта ичида 15 фоизга арзонлашди.
Ўзбекистонда мандарин нархи кетма-кет тўртинчи ҳафта пасайиб бораётгани ҳисобга олинса, 20 октябрдан 17 ноябргача ўртача улгуржи нарх 29 минг сўмдан 17 минг сўмгача яъни ўтган ойда 41 фоизга пасайган.
Шу билан бирга, мандаринларнинг жорий улгуржи нархлари ўтган йилнинг шу санасида қайд этилган нархлар даражасида ва 2021 йилнинг шу санасига нисбатан 31 фоизга юқори.
Сўнгги икки ҳафтада маҳаллий етиштирилган лимон нархи ҳам кескин тушиб кетди, шу даврда Тошкент бозорларида чакана нархлар ўртача 1,5 баробарга арзонлашди.
.jpg)
Ўз навбатида, бу ички бозорда маҳаллий лимон етказиб беришнинг босқичма-босқич ўсиши билан боғлиқ, чунки мамлакат иссиқхона хўжаликларида ушбу маҳсулотларни йиғиб олиш фаол босқичга ўтмоқда.
17 ноябрь ҳолатига кўра, Ўзбекистонда етиштирилган лимоннинг Тошкент бозорларида ўртача чакана нархи 1 килоси учун 25 минг сўм атрофида.
Изоҳ (0)