FТ: Исроил ҲАМАСга қарши уруш учун 6 млрд доллар қарз олди

Исроил сўнгги ҳафталарда ҲАМАСга қарши урушни молиялаштириш учун миллиардлаб доллар заём олди. Бу ҳақда Financial Times хабар берди.

Гап халқаро инвесторлардан 6 миллиард доллардан ортиқ маблағ жалб этиш ҳақида бормоқда. Бунга 5,1 миллиард долларлик учта янги облигация, доллар ва евродаги мавжуд облигацияларнинг олтита қўшимча чиқарилиши, шунингдек, АҚШ ташкилоти орқали 1 миллиард доллардан ортиқ маблағ киради.

Таъкидланишича, облигациялар хусусий келишувлар асосида чиқарилган, бунда қимматли қоғозлар давлат бозорида эмас, балки танланган инвесторларга таклиф этилади. Бу пулни тезроқ қўлга киритиш ва эътиборни жалб қилмаслик мақсадида амалга оширилган. Битимларнинг якуний қиймати ошкор этилмаган. Банкирлар нархни очиқ келишувга мос равишда белгилаганини айтган.

Исроил тўрт ва саккиз йил ичида муддати тугайдиган облигациялар бўйича 6,25 ва 6,5 фоиз купонларни тўлайди. Бу чиқарилган вақтида 4,5 фоиздан 4,7 фоизгача бўлган АҚШ ғазначилигининг базавий облигация даромадидан анча юқори. Financial Times’га кўра, битимлар Goldman Sachs ва Bank of America томонидан ташкил этилган.

“Уруш давом этаётганини ҳисобга олсак, бозор ҳали ҳам Исроил қарзига жуда юқори баҳо қўяди”, —  деди исми сир қолишини сўраган дунёдаги энг йирик инвестиция банкларидан бирининг стратеги.

• Исроил Молия вазирлигининг маълум қилинишича, Фаластин гуруҳи билан уруш Исроилга 200 миллиард шекел (51 миллиард доллар)га тушади. Конфликт саккиз ойдан бир йилгача давом этса, Ғазо секторидан ташқарига тарқалмаса ва 350 минг захирадаги аскар тез орада ишга киришса, шунча маблағ керак бўлади.