Телебошловчилик фаолияти учун энг кўп ҳақ оладиган Болливуд актёрлари

Ҳиндистон телевидениеси сўнгги 10 йил ичида тубдан ўзгарди. Бунинг асосий сабаби сифатида шоуларга Болливудда машҳурликка эришган ижодкорларнинг бошловчилик қилаётгани кўрсатилмоқда. Актёрлар бошловчилик фаолиятига доир таклифларни бажонидил қабул қиляптилар, бу улар учун яхшигина даромад топиш ва машҳурлик даражасини ошириш имконияти ҳамдир. Бугун телебошловчилик фаолияти учун рекорд даражада ҳақ оладиган Болливуд актёрлари ҳақида гаплашамиз.

Салмон Хон (14 крор, тахминан 1 400 000 доллар)

Салмон Хон Ҳиндистоннинг энг “қиммат” телебошловчиси ҳисобланади. Исталган фильм ёки шоуни хит даражасига олиб чиқиш учун машҳур исм-шарифининг ўзи етарли бўлади. Шунинг учун ҳам телешоу муаллифлари актёрга у талаб қилган суммани тўлашга тайёр туришади. Ижодкор “Катта босс” шоусидаги иштироки учун 11 крор миқдорида ҳақ олган. Бу йили эса мазкур шоунинг ҳар бир эпизоди учун актёрга 14 крордан ҳақ тўланмоқда. “Катта босс” шоусининг машҳурликка эришишида асосий ролни Салмон Хон ўйнаган. Унинг шоудаги иштироки мухлислар учун ҳар доим қизиқ бўлган. Актёр шоудаги низоларни маҳорат билан бартараф этади, рақибларга қимматли тавсиялар беради ва дам олиш кунлари иштирокчиларнинг номақбул хатти-ҳаракатларини бирма-бир санаб чиқади.

Амитабҳ Баччан (5 крор, тахминан 500 000 доллар)

Ҳиндистонликлар севиб томоша қиладиган энг машҳур шоулардан бири – Kaun Banega Krorepati  Sony TV  орқали эфирга узатилади ва унинг оммалашиб кетишига катта ҳисса қўшган инсон – Амитабҳ Баччан ҳисобланади. Актёрнинг саъй-ҳаракатлари билан шоу мамлакатда катта машҳурликка эришган. Ижодкор оддий одамлар билан мулоқот қилиб, уларни беихтиёр шоуда иштирок этишга ундайди. Амитабҳ Баччан шоунинг ҳар бир эпизоди учун 5 крордан ҳақ олади. Айтишларича, мазкур шоунинг машҳурлигини бошқа ҳеч бир инсон жаноб Баччан каби юқори даражада “ушлаб туролмайди”.

Шоҳруҳ Хон (3 крор, тахминан 300 000 доллар)

Болливуд қироли шу кунга қадар кўплаб йирик телевизион шоуларга бошловчилик қилган. Улар орасида Paanchvi Pass Se Tej Hai, Kaun, Banega Crorepati, Zor Ka Jhatka каби машҳур лойиҳалар бор. Бироқ актёр бошловчилик фаолияти учун энг кўп миқдордаги гонорарни ўтган йили Ted Talks India шоусидаги иштироки учун олган. Ижодкорга ҳар бир эпизод учун 3 крордан ҳақ тўланган.

Амир Хон (3 крор, тахминан 300 000 доллар)

Амир Хон томонидан асос солинган Satyamev Jayate ток-шоуси телевидениедаги ҳақиқий воқеаларни оммага намойиш этиш ва жамиятдаги зўравонликка қарши кураш мавзусини ёритиш билан шуғулланади. Маълумотларга кўра, Амир Хон шоунинг ҳар бир эпизоди учун 3 крордан ҳақ олган ва уни хит даражасига кўтарган.

Акшай Кумар (1.5 крор, тахминан 150 000 доллар)

Мухлислар Акшай Кумарни экран орқали телебошловчи сифатида кўрмаганларига анча бўлди. У ижодий фаолияти давомида Master Chief India, Hatron Ke Hiladi шоуларига бошловчилик қилган. Ижодкор ушбу шоу дастурларининг ҳар бир эпизоди учун 1.5 крордан ҳақ олгани маълум. Афсуски, Акшай Ҳиндистоннинг энг машҳур актёрларидан бири бўлишига қарамай, ушбу дастурлар хит даражасигача кўтарилмаган.