Бугунги кунда интерер бўйича мутахассислар уйда сунъий гуллар сақламасликни тавсия қилишмоқда. Бунинг асосий сабаблари нималардан иборат? Сунъий гуллар хонадон соҳибларининг саломатлигига зарар етказиши мумкинлиги ростми? Қуйида шу саволларга жавоб берамиз.
Сунъий гулларга нисбатан муносабат ҳар кимда турлича. Кимлардир бу турдаги гулларни паст сифати учун хуш кўрмайди, бошқалар эса улар ёрдамида уйни безатиш осон ва қулай деган фикрда. Дарҳақиқат, ушбу қарашлар арзирли асосга эга: пластикдан ишлаб чиқарилган гуллар алоҳида парваришни талаб қилмайди ва чидамлилиги билан ажралиб туради. Шундай бўлса ҳам бу ҳар кимнинг дидига боғлиқ масала. Уйингизни сунъий гуллар билан безатмоқчисиз, аммо улар ҳақида тўлиқ тасаввурга эга эмасмисиз? Бу борада сизга ёрдам беришга шаймиз. Хўш, уйда сунъий гул сақлаш нимаси билан хавфли?
1. Саломатликка зарар етказади
Бизнингча, бу масалада ортиқча тушунтиришларга ҳожат йўқ. Арзон материаллардан тайёрланган пластик гулларнинг аксарият қисми Хитойда ишлаб чиқарилади. Одатда уларнинг асосини поливинилхлорид ёки арзон пластмасса ташкил этади. Бу эса сунъий гуллар ўзида саломатлик учун зарарли моддаларни сақлашидан дарак беради.
Хавфли токсинлар ҳавога кўтарилиб, аллергиянинг оғир шаклини келтириб чиқариши мумкин. Гуллар матодан тайёрланган бўлса, ўзига чанг йиғиб олади. Гулларни чангдан тозалаш эса ҳаддан ташқари қийин бўлади.
Латекс, органза каби синтетик матолар маълум шаклга кириши учун уларга кимёвий аралашмалар билан ишлов берилади. Ранг учун эса анилин бўёқларидан фойдаланилади. Бу турдаги бўёқлар ҳам саломатлик учун ҳаддан ташқари хавфли: улар бош айланишини келтириб чиқариши, бош оғриғи, ҳолсизликка сабаб бўлиши мумкин. Гул чанглари пенопластдан ясалади, ушбу материал парчаланганда ўзидан кансероген модда – стиролни ажратиб чиқаради. Безак сифатида ишлатиладиган майда деталлар эса болалар учун хавфли бўлиб, кўп ҳолларда кичкинтойлар уларни бурун тешигига киритиб кўришади ёки ютиб юборишади.
2. Табиат учун хавфли
Арзон пластикдан тайёрланган гулларнинг табиатга келтирадиган зарари саломатликка етказадиган зиёнидан кам эмас. Уларни экологик жиҳатдан хавфсиз деб бўлмайди. Кундалик ҳаётда пластик супургилар, саватлар, идишлар, пакетларнинг фаол қўлланила бошлангани экофаолларни ташвишга солгани рост. Яроқсиз ҳолатга келган пластик буюмлар чиқиндига улоқтирилганидан кейин экология учун ҳақиқий муаммога айланади. Пластикнинг парчаланиши учун 100-500 йил керак бўлади. Бу эса пластик буюм юз йиллар давомида ўзидан саломатлик учун хавфли бўлган оғир металлар ва диоксинларни ажратиб чиқаришини англатади. Уйингизга ўзига хос кўриниш беришни, шу билан бирга атроф-муҳит ҳақида қайғуришни истасангиз, диққатингизни ҳақиқий гулларга қаратинг.
3. “Арзон” дизайн
Интерьер дизайнерлари уйингизни сунъий гуллар ва ўсимликлар билан безатмоқчи бўлсангиз, тежамкорлик ҳақида унутишни маслаҳат беришади. Ҳамёнбоп нархдаги декоратив гуллар аксарият ҳолатларда нотабиий кўринади, интерьер дизайнини “бузиб қўяди”. Бундан ташқари, улар ўзининг чиройли ҳолатини жуда тез йўқотади, бўёқлари ўчиб кетади ёки хира тортади. Шунда ҳам сунъий гуллар харид қилиш фикридан қайтмаган бўлсангиз, уларни танлаш вақтида тежамкорлик ҳақида унутинг.
Сунъий гулларни винил ва сифатли синтетик материаллардан тайёрланган турларини харид қилинг. Уларни бозордан эмас, махсус фирмалардан сотиб олинг. Сўнгги йилларда бу каби фирмалар интерьер учун гуллар тайёрлашни ҳақиқий санъат турига айлантиришган. Тўғри, маҳсулотлар нархи ҳаддан ташқари қиммат, бироқ сифати қийматига арзийди. Шунингдек, гулларни уйингизга жойлаштиришда ҳам муҳим қоидани ёдда тутинг – уларни қоронғи бурчакларга жойлаштириш тавсия этилмайди. Акс ҳолда гулларнинг чиройини тўлиқ очиб бера олмайсиз. Энг муҳими – ошириб юборманг. Уйингизни гуллар билан тўлдириб ташлаш руҳий ҳолатингизга салбий таъсир кўрсатиши мумкинлигини ёдда тутинг.
Изоҳ (0)