Шимолий Корея КХДР ва Жанубий Корея ўртасидаги қуролсизлантирилган ҳудудни назорат қилувчи БМТ қўмондонлигини тарқатиб юборишга чақирди. Бу ҳақда Шимолий Корея марказий телеграф агентлиги хабар берди.
Пхеньян АҚШ шафелигида фаолият юритаётган Жанубий Кореядаги БМТ қўмондонлигини “ноқонуний ҳарбий ташкилот” деб атаган. 1950 йилда яратилган ушбу тузилма Корея урушини тугатган сулҳ шартлари бажарилишини назорат қилади.
Баёнотга Сеулда АҚШ мудофаа вазири Ллойд Остин ҳамда унинг Жанубий Корея ва Япониядаги ҳамкасблари Шин Вон Сик ва Минору Кихара ўртасидаги учрашув сабаб бўлган. Музокаралар чоғида томонлар Шимолий Корея ракеталари бўйича реал вақт режимида маълумотлар алмашиш схемаси бўйича келишиб олган, КХДР ва Россия ўртасидаги кучайиб бораётган ҳарбий ҳамкорликни қоралаб, буни БМТ резолюцияларини бузиш деб атаган.
АҚШ давлат котиби Энтони Блинкен Сеулга ташрифи чоғида Россия ва КХДР ўртасидаги ҳарбий ҳамкорлик кучайиб бораётганидан хавотир билдирган, кореялик ҳамкасби Пак Чиннинг “жиддий хавотирлари”ни тушунишини айтганди.
Сентябрь охирларида КХДР Олий халқ ассамблеяси конституцияга Шимолий Кореянинг ядровий давлат мақомини мустаҳкамловчи ўзгартиришларни қабул қилганди. Ушбу ўзгартиришлар Шимолий Кореянинг атом қуроллари арсеналини оширишини ва бундан буён ўзини тўлақонли ядровий давлат деб билишини назарда тутади. Тузатишлар икки кунлик муҳокамадан сўнг қабул қилинган.
Изоҳ (0)