Қатар компанияси Ўзбекистонда қурилиш материаллари ишлаб чиқариш лойиҳаларида иштирок этади

Қатарнинг Qatar National Cement компанияси Ўзбекистонда қурилиш материаллари ишлаб чиқариш лойиҳаларида иштирок этади.

Инвестициялар, саноат ва савдо вазирлигининг хабар қилишича, Лазиз Қудратов ушбу компания ижрочи директори Эсса Калдари билан музокаралар ўтказди. Ўзаро манфаатли ҳамкорликни янада кенгайтириш масалалари муҳокама қилинди, қурилиш материаллари ишлаб чиқариш бўйича қўшма лойиҳаларни амалга ошириш истиқболлари кўриб чиқилди.

Томонлар ҳамкорликни янада ривожлантириш ва муҳокама қилинган барча лойиҳалар бўйича ишларни тезроқ бошлаш юзасидан қўшма чоралар кўришга келишиб олди.

Ундан бир кун аввал эса Қатар National Cement компанияси вакиллари Қурилиш материаллари саноатини ривожлантириш бўйича кенгаш  уюшмаси раҳбарияти билан учрашган.

Учрашувда ҳудудлардаги мавжуд хом ашё захириларидан фойдаланиб, қурилиш материаллари саноатида инновацион, энергия тежамкор, экспортбоп ва импорт ўрнини босувчи инвестицион қўшма лойиҳаларни амалга оширишга келишилди. Шунингдек, кадрлар тайёрлашда юқори малакали мутахассисларини жалб қилиш, халқаро аккредитланган синов лабораториялари ўртасида ўзаро тажриба алмашинувини йўлга қўйиш юзасидан қатор келишувларга эришилди.

Маълумот учун, Qatar National Cement компанияси 1965 йилдан буён фаолият юритади ва қурилиш материаллари ишлаб чиқариш бўйича минтақадаги йирик компаниялар сирасига киради. Қатарнинг цементга бўлган талабнинг 100 фоизини қоплайди. Йиллик ишлаб чиқариш қуввати 8 миллион тонна. Йиллик даромади 1 миллиард доллар (2022 йил), ишчилар сони 2 минг киши.