Ўзбекистонда ижтимоий тармоқлар орқали турли оздирувчи ёки семиртирадиган, шунингдек, протеинли биологик фаол қўшимчалар савдоси борган сари авж олмоқда. Санитария-эпидемиологик осойишталик ва жамоат саломатлиги қўмитаси уларнинг айримлари рўйхатга олмагани, таркиби текширилиб, хавфсизлиги тўғрисида хулоса берилмаганидан огоҳлантирди.
Биологик фаол қўшимчалар (БФҚ) — инсон организмидаги физиологик бузилишларнинг олдини олиш ҳамда соғлом балансни тиклаш мақсадида рационини мақбул даражага етказиш ёки организмни зарур бўлган фойдали моддалар билан тўлдириш учун мўлжалланган, таркибида келиб чиқиши табиий ёки табиийга ўхшаш сунъий биологик фаол моддалар (уларнинг концентратлари) ва (ёки) пробиотик компонентлар ҳамда пробиотик микроорганизмлар мавжуд озиқ-овқат маҳсулотлари ҳисобланади.
Биологик фаол қўшимчалар даволовчи таъсирга эга эмас. Даволовчи таъсирга эга бўлган маҳсулотлар дори воситалари ҳисобланади.
Қўмитанинг билдиришича, Республикада фаолият олиб бораётган “Фарм Формат” МЧЖ томонидан бир қатор БФҚлар ва гигиеник воситалар ишлаб чиқарилган, рухсатнома БФҚ сифатида берилган бўлсада, бир пайтнинг ўзида ушбу БФҚ ва гигиеник воситалар таркиби нуқтаи назаридан дори воситалари хусусиятига эга экани аниқланди:
- 100 мл флаконларда қадоқлаб чиқарилган, ичиш ва маҳаллий қўллаш учун мўлжалланган “Хлорофиллиптим плюс” эритмалари;
- 20 мл флаконларда қадоқланган “Хлорофиллиптим плюс” спрей маҳсулоти;
- “Имбир Эффекти с витамином С” (Гингер Эффеcт Витамин C);
- “Лороплюс” (Loroplus) (чайиш учун эритма 200 мл.);
- “Лороплюс” (Loroplus) (томоқ учун спрей 20 мл.);
- “Бетагин-ФФ” (10% маҳаллий ва ташқи мақсадлар учун эритма, 50 мл. дан флаконда);
- “Димексид – ФФ”;
- “Ковифлазид” (Coviflazid) (ичиш учун ҳамда маҳаллий қўллаш учун томчи 30 мл.);
- “Эффекти классик Черний Имбир” (Black Гингер Эффеcт) (тез эрийдиган гранулалари 8 гр. дан саше пакетчаларда) аслида БФҚ кўринишида ишлаб чиқаришга рухсат олинган бўлсада, дори воситаси сифатида тайёрланганлиги аниқланган.
“Таъкидлаш жоизки, Санитария-эпидемиологик осойишталик ва жамоат саломатлиги қўмитаси томонидан бу каби воситаларни ишлаб чиқаришни (қалбаки ва дори воситасини) рўйхатга олмаган, таркиби текширилиб, хавфсизлиги тўғрисида хулоса берилмаган”, — дея огоҳлантирди қўмита ўз хабарида.
“БЕК БРЕНД PHARM” масъулияти чекланган жамияти томонидан баъзи — “Расторопша” номли маҳсулот қўмита томонидан таркиби текширилмаган маҳсулот савдоси билан шуғулланаётгани аниқланган.
“Санитария-эпидемиологик осойишталик ва жамоат саломатлиги қўмитаси аҳолидан таркиби номаълум бўлган, хавфсизлиги кафолатланмаган маҳсулотларни номаълум кимсалар ва сохта тадбиркорлардан сотиб олиб, ўзбошимчалик билан истеъмол қилмасликни сўраб қолади”, — дейилади хабарда.
Қўмита юқоридаги каби ҳолатлар юзага @Sanepidmurojaatbot га йўллаши мумкинлигини эслатиб ўтди.
Изоҳ (0)