“Тафтиш.уз” ахборот агентлигининг собиқ раҳбари сиртдан қамоққа олинди

Бош прокуратура ҳузуридаги иқтисодий жиноятларга қарши курашиш департаментининг Шофиркон туман бўлими томонидан “Тафтиш.уз” ахборот агентлиги собиқ раҳбари Ғ.А.га нисбатан жиноят иши қўзғатилди. Бу ҳақда Бухоро вилояти прокуратураси ахборот хизмати “Дарё”га маълум қилди.

Аниқланишича, “Тафтиш.уз” ахборот агентлиги собиқ раҳбари Ғ.А. туман ҳудудида яшовчи фуқароларни алдаб, агентликнинг ижтимоий тармоқлардаги канали орқали уларнинг муаммоларини ҳал қилиб бериш эвазига жуда кўп миқдордаги пулларини олиб, шахсий эҳтиёжларига ишлатиб юборган.

Хусусан, Ғ.А. 2020 йил октябрда муқаддам Конимех туманидаги “Алибек Ислом” МЧЖ раҳбари А.И.га қарашли бўлган, кейинчалик туман Қоракўлчилик ширкати балансига ўтказиб юборилган 1 400 гектар яйлов ерларни фермер хўжалиги номига қайта расмийлаштириб бериш эвазига А.И.дан 5 минг доллар пул ва бошқа моддий қимматликларни олиб, шахсий эҳтиёжлари учун сарфлаган.

Фуқаро Қ.Х.дан туман ҳокимлиги захирасига олинган 1 800 гектар яйлов ерларни унинг ўзига қайтариб олишда ёрдам беришини айтиб, бунинг эвазига ундан жами 22 минг доллар олиб, талон-торож қилган.

2022 йилнинг ноябрь ойида фуқаро М.С.га Жиноят кодексининг 105-моддаси (қасддан баданга ўртача оғир шикаст етказиш) билан содир этган жинояти учун қамоққа олиш тарзидаги эҳтиёт чораси қўлланган вақтда унинг отаси ўғлини қамоқдан чиқаришга ёрдам беришини айтиб алдаб, 5 минг долларни фирибгарлик йўли билан қўлга киритган. Терговга қадар текширувда М.С.нинг аппеляция судлов босқичида жабрланувчи билан ярашгани сабабли қамоқдан озод этилгани аниқланган.

2022 йилнинг апрель ойида фуқаро А.Ҳ.нинг Андижон вилояти (Миллий гвардия)да ишловчи укаси А.Ҳ.нинг ишини Бухоро вилоятига кўчириб бериш эвазига ундан фирибгарлик йўли билан 800 доллар олиб, шахсий эҳтиёжлари учун сарфлаган.

Яна бир ҳолатда “Тафтиш.уз” ахборот агентлиги собиқ раҳбари Ғ.А. 2021 йилнинг баҳорида Ж.У.дан 10-15 кунда қайтариб бериш шарти билан 500 доллар олиб, қайтармасдан, алдаб келган.

Қайд қилинган ҳолатларда Ғ.А. фуқароларни алдаш орқали уларнинг жами 33 минг 300 долларини ўзлаштириб олиб, талон-торож қилиб юборган. Мазкур ҳаракатлари учун “Тафтиш.уз” ахборот агентлиги собиқ раҳбари Ғ.А. 2023 йилнинг 6 ноябрь куни Жиноят кодексининг 168-моддаси 3-қисми “б” банди (фирибгарлик — такроран ёки хавфли рецидивист томонидан), 168-моддаси 4 - қисми “а” банди (фирибгарлик — жуда кўп миқдорда) ҳамда 25, 211-моддаси 2-қисми “а” банди билан ишда айбланувчи тариқасида жалб қилиниб, сиртдан қамоққа олиш тарзидаги эҳтиёт чораси қўлланган.

Ҳозирги кунда Пешку туман ички ишлар бўлими томонидан тергов ҳаракатлари олиб борилмоқда.