Исроил қуруқликдаги қўшинлари ҲАМАСнинг Ғазо секторидаги ҳарбий лагерларидан бирини назорат остига олди. Бу ҳақда мамлакат армиясининг матбуот хизмати хабар берди.
Қайд этилишича, назорат остига олинган ҳудудда кузатув пунктлари, жанговар машғулотларни ўтказиш мўжалланган майдончалар ва гуруҳ томонидан фойдаланилган ерости туннеллари мавжуд.
Маълумотларга кўра, Исроил томонидан амалга оширилган авиазарба оқибатида бир неча киши, жумладан, махсус операцияга жавобгар Жамол Муссо ҳам ўлдирилган. У ҲАМАСнинг махсус хавфсизлик бошқармаси бошлиғи бўлган.
“Бундан ташқари, Исроил ҳарбийлари қуруқликдаги жангларда ҲАМАС батальонлари командирларини ҳам ўлдирди”, — дейилади хабарда. Қирувчи самолётлар бир сутка давомида 450 дан ортиқ объектга ҳужум уюштирган.
Ўтган ҳафтадан бери Исроил армияси Ғазо секторида қуруқликдаги операцияларни кенгайтирди. Улар ҲАМАСнинг ўнлаб жангариларини йўқ қилгани ва Ғазо секторидаги ҲАМАС инфратузилмасини вайрон қилганини билдирди. Фаластиннинг WAFA агентлиги хабар беришича, Исроил армиясининг ҳужумлари оқибатида 9400 дан ортиқ фаластинлик ҳалок бўлган ва 25 мингдан ортиқ киши жароҳатланган.
Изоҳ (0)