Россияда беш ойдан бери иш ҳақини ололмай келаётган меҳнат мигрантларининг иш ҳақи ундириб берилди. Бу ҳақда Ташқи меҳнат миграцияси агентлиги хабар берди.
Қайд этилишича, Россиянинг Самара вилоятида ишлаётган Ўзбекистон фуқаролари Ташқи меҳнат миграцияси агентлигининг мазкур ҳудуддаги вакилига ҳужжатлари ва ойлик иш ҳақини ундириш масаласида мурожаат қилган.
Ушбу фуқаролар Самара вилояти Красноярск туманидаги иссиқхоналарда иш берувчи билан шартнома тузмасдан меҳнат фаолиятини амалга оширган. Иш берувчи бундан фойдаланиб, беш ойдан буён 891 минг 812 рубль (9,6 минг доллар) миқдоридаги иш ҳақини тўламасдан ишлатган.
Вакиллик ходимлари томонидан иш берувчи билан алоқа ўрнатилган ва фуқаро аризаси юзасидан суриштирув ишлари олиб борилган. Натижада фуқароларнинг иш ҳақи ва ҳужжатлари тўлиқ қайтарилган.
Бундан олдин Россияда ишлаётган ўзбекистонликларнинг 36 миллион сўм иш ҳақи, Қозоғистонда 32 нафар Ўзбекистон фуқаросининг 15 миллион тенге миқдоридаги иш ҳақи ундирилгани тўғрисида хабар берилганди.
Изоҳ (0)