Дубайни айланиб келиш ниятида 50 дан ортиқ фуқарони чув туширган йигитнинг режаси амалга ошмай қолди, деб хабар бермоқда ИИВ Киберхавфсизлик маркази.
Маълум қилинишича, Тошкент шаҳри Учтепа туманида яшовчи 20 ёшли Т.Ж. ИИОга мурожаат қилиб, банк картасидан 300 минг сўм миқдоридаги пули номаълум шахс томонидан фирибгарлик йўли билан ўзлаштирилганини маълум қилган.
Тезкор-қидирув хизмати Киберхавфсизлик бўлинмалари томонидан ўтказилган тезкор-қидирув тадбирлари натижасида, ушбу жиноятни Наманган вилояти Чопток туманида яшовчи 18 ёшли Т.Б. содир этгани аниқланган.
Гумонланувчи сифатида тергов органларига жалб этилган Т.Б. интернет фойдаланувчиларига Telegram даги “безмаклер” номли канали орқали Тошкент шаҳридан ижарага хонадон топиб беришини ваъда қилган ҳолда фуқароларни қизиқтириб, олдиндан бошланғич тўлов сифатида уларнинг пулларини ўзининг банк картасига ўтказиб олган, сўнг ёзишмаларни ўчириб юбориб, бойлик орттириб келаётгани аниқланган.
Мазкур ҳолат юзасидан Жиноят кодексининг 168-моддаси 3-қисми билан жиноят иши қўзғатилиб, Т.Б.нинг содир этилиб фош этилмай қолган бошқа шу турдаги жиноятларга алоқадорлигини текшириш мақсадида тергов, тезкор-қидирув ҳаракатлари давом эттирилмоқда.
Изоҳ (0)