Қозоғистон Ички ишлар вазирлиги ходимлари Чимкентдаги ғишт заводларида ноқонуний ушлаб турилган ва эксплуатация қилинган 60 дан ортиқ Ўзбекистон фуқаросини озод қилди. Бу ҳақда “Polisia.kz” хабар берди.
Қайд этилишича, 14 октябрь куни Ақтўбе вилоятида яшовчи аёл Олмаота полициясига мурожаат қилган. Унинг айтишича, Ўзбекистон фуқароси бўлган укаси Чимкентдаги ғишт заводида меҳнат қуллигидан қочгани ва Олмаотага етиб келгани, бироқ у ўша ерда номаълум шахслар томонидан ўғирлаб кетилгани ҳақида хабар берган.
Олмаота ва Чимкент шаҳарларининг уюшган жиноятчиликка қарши курашиш бошқармаси ходимлари ҳамкорлигида тезкор тадбир ўтказилган. Ҳуқуқ-тартибот ходимлари Чимкент ва Туркистон вилоятларидаги ғишт заводларининг уч нафар эгасини қўлга олган. Уларнинг икки нафари ака-укалар.
Иккита ғишт заводи ҳудудини тинтув қилиш чоғида тезкор ходимлар 60 дан ортиқ хорижлик ишчилар борлиги, уларнинг барчаси Ўзбекистон фуқаролари экани маълум бўлган.
Судга қадар текширув давомида ўзбекистонликлар заводга ишга таклиф этилгани, кейин эса ҳужжатлари олиб қўйилиб, маошлари берилмай келгани ва вақти-вақти билан қўрқитиш мақсадида жисмоний тазйиққа учрагани аниқланган.
Ғишт заводлари эгаларига нисбатан “Меҳнат эксплуатацияси мақсадида қонунга хилоф равишда озодликдан маҳрум қилиш” ва “Бошқаларнинг ҳақ-ҳуқуқларини поймол қилиш” моддалари билан жиноят иши қўзғатилган.
Ташқи меҳнат миграцияси агентлигининг маълум қилишича, вазият Ўзбекистоннинг Олмаота шаҳридаги Бош консулхонаси томонидан назоратга олинган бўлиб, суриштирув давомида ҳужжатлари йўқ 40 нафар фуқаро Чимкент шаҳридаги ИИБ вақтинчалик сақлаш марказига ва 24 нафари “Сана Сизем” ташкилоти ёрдамида ҳостелга жойлаштирилган.
18 октябрь куни 40 нафар фуқаронинг шахсни тасдиқловчи ҳужжатлари Чимкент шаҳри полицияси бўлими ходимлари томонидан топилган ва уларга нисбатдан Қозоғистоннинг Маъмурий кодекси бўйича иш кўрилмоқда.
Ушбу ҳолат бўйича Ташқи меҳнат миграцияси агентлигининг Чимкент шаҳридаги вакили томонидан Қоратау тумани полицияси бўлимида ушбу фуқаролар билан суҳбат ўтказилиб, уларнинг ҳуқуқлари тушунтирилган. Фуқароларнинг асосий қисми паспортлари қайтариб берилса, ватанга қайтишини, иш берувчига нисбатан эътирозлари йўқлигини билдирган.
Аввалроқ Россиянинг Нижний Новгороддаги муниципал болалар боғчаси қурилишида ишлаган ўзбекистонлик икки ишчи қулликдан қочишга муваффақ бўлгани тўғрисида хабар берилганди.
Изоҳ (0)