Нонушта — куннинг энг муҳим таоми ҳисобланади. Буни эътиборсиз қолдирмайдиган ҳар бир киши фойдали нонушта тайёрлашни яхши кўради. Ўз вазнини кузатадиган инсонлар учун нонушта одатда мазали ва шу билан бирга организмга зарар етказмайдиган бўлиши керак. Қуйида сизга кун давомида яхши кайфият бағишлайдиган, шунингдек, калорияларни ёқишингизга ёрдам берадиган нонуштанинг 3 та вариантини тақдим этамиз.
Сули ёрмасидан тайёрланадиган қуймоқ
Бундай турдаги қуймоқ майдаланган сули ёрмасидан тайёрланади. Уни оддий бўтқанинг мазали муқобили сифатида ёки таъбингизга қараб ҳар қандай начинка билан истеъмол қилишингиз мумкин. Қуймоқнинг ичига нима солишингиз нафақат унинг мазасига, балки калориялигига таъсир қилишини унутманг.
Қуймоқ рецепти жуда оддий: 4 ош қошиқ майдаланган сули ёрмасига тухум ва 50 мл сут қўшинг. Буларнинг барчасини аралаштириш ва пишгунига қадар қиздирилган товада пишириш керак.
Творог ва мевалар
Агар эрталаб овқат ейишни ёқтирмайдиганлардан бўлсангиз, сиз учун резаворлар ёки мевалар қўшилган творог яхши танлов бўлиши мумкин. Ёғ миқдори оптимал 5 фоиз бўлган творогни танланг, ширинлик учун унга севимли резавор меваларингизни қўшиб мазали ва фойдали нонушта тайёрланг.
Агар ширинликларни ёқтирмасангиз, творогга кўкатларни қўшишингиз мумкин, у ҳам мазали ва фойдали бўлади.
Омлет ва сабзавотлар
Оддий омлетга сабзавотлар қўшиб тайёрланадиган егулик ҳам сизга керакли энергия ва фойдали микроэлементларни берадиган идеал нонушта бўлади. Омлет тезроқ ҳазм бўлишини истасангиз сутни сув билан алмаштиринг ва унга бир оз янги исмалоқ қўшинг.
Изоҳ (0)