Ҳамкорбанк ва Япония халқаро ҳамкорлик агентлиги ўртасида Ўзбекистонда микро, кичик ва ўрта бизнес корхоналарни молиялаштириш мақсадида кредит шартномасини имзолаш маросими бўлиб ўтди.
Hyatt Regency Tashkent меҳмонхонасида бўлиб ўтган тадбирда Ҳамкорбанк АТБ, Япония халқаро ҳамкорлик агентлиги ва Халқаро молия корпорацияси вакиллари иштирок этди. Шартномага кўра Ўзбекистонда микро, кичик ва ўрта бизнес корхоналарни молиялаштириш имкониятларини янада кенгайтириш ва хусусий секторга инвестицияларни ошириш мақсадида 35 миллион АҚШ доллари ажратилади.
Маълумки, микро, кичик ва ўрта бизнес корхоналари жаҳон мамлакатлари тажрибасида ўзининг юксак натижа ва муваффақиятлари билан мустаҳкам ўрин эгаллаган бўлиб, аксарият давлатларда унинг ялпи ички маҳсулотдаги улуши 60-70 фоизни ташкил этади. Жумладан, Ўзбекистонда ҳам ялпи ички маҳсулотнинг 54 фоизи ва иш ўринларининг 78 фоизи ушбу турдаги корхоналарнинг ҳиссасига тўғри келади.
“Кичик ва ўрта бизнес субъектларининг мамлакат иқтисодиётидаги муҳим ўрни ва салмоғини ҳисобга олган ҳолда, биз Япония Халкаро хамкорлик агентлиги томонидан тақдим этилаётган маблағлар ва уларни банкимиз томонидан мақсадли ишлатилиши, микро, кичик ва ўрта бизнес субъектларини молиявий хизматлардан фойдаланиш кўрсаткичларини ошириб, Ўзбекистон Республикаси иқтисодиётида ижобий ўзгаришларга сабаб булишига ишонамиз”, — деб таъкидлади “Ҳамкорбанк” АТБ бошқаруви раиси Бахтиёржон Жўраев.
Таъкидланишича, мазкур лойиҳа, Ўзбекистонда микро, кичик ва ўрта бизнес корхоналаринниг барқарор ривожланишига, уларни молиялаштиришга йўл очади ва бу билан БМТ Бош ассамблеясининг Барқарор ривожланиш мақсадларида белгиланган7 8-мақсад (муносиб иш ўринларини яратиш ва иқтисодий ўсиш) ва 17-мақсадга (кўзланган мақсадлар йўлидаги ҳамкорлик) эришишга ҳисса қўшиши лозим.
“Кичик ва ўрта бизнесни рағбатлантириш мамлакатнинг кейинги ривожи учун тобора муҳим аҳамият касб этмоқда. Ўзбекистон иқтисодиётида ҳам, уларнинг ишончли кредит бозорига кириш имкониятларини яхшилаш масаласида шошилинч чоралар кўрилмоқда. Жумладан, 2022—2026 йилларга мўлжалланган Янги Ўзбекистоннинг тараққиёт стратегиясида ҳам ушбу масалага алоҳида эътибор қаратилган. Умид қиламанки, келишув натижасида ажратилаётган кредит маблағлари Ўзбекистон ҳукумати томонидан белгиланган устувор мақсадларга янада тезроқ эришиш имконини беради – деб, фикр билдирди Япония халқаро ҳамкорлик агентлиги катта вице-президенти Имото Сашико.
Ушбу кредит маблағлари ривожланаётган мамлакатларда молиявий хизматлардан фойдаланиш даражасини оширишга кўмаклашиш учун 2023 йилнинг май ойида жорий қилинган 1,5 миллиард АҚШ доллари миқдоридаги қарз дастури – Молиялаштиришни тезлаштириш механизми (ФАФИ) асосида Халқаро молия корпорацияси билан ҳамкорликда молиялаштирилади.
“Лойиҳага жаҳон миқёсидаги нуфузли молия институти – Халқаро молия корпорацияси жалб этилиши муҳим аҳамиятга эга, чунки ушбу воқеа хусусий инвесторларнинг эътиборига сабаб бўлади, натижада Ўзбекистонга янада кўпроқ инвестиция маблағлари киритилади”, — деб, қўшимча қилди Имото Сашико хоним.
Маълумот учун:
Япония халқаро ҳамкорлик агентлиги иқтисодий инфратузилмани янгилаш ва такомиллаштириш, бозор иқтисодиётига ўтишни жадаллаштириш мақсадида инсон ресурсларини ва институционал тузилмаларни ривожлантиришга кўмаклашиш, иқтисодиёт ва саноатни рағбатлантириш, шунингдек, ижтимоий секторни (соғликни сақлаш, қишлоқ хўжалиги ва қишлоқ ҳудудларини ривожлантириш) қайта тизимлашга кўмаклашиш сингари устувор соҳалардаги лойиҳаларни амалга ошириб келади. Агентликнинг Тошкент шаҳридаги ваколатхонаси ўз фаолиятини 1999 йилда бошлаган.
Ҳамкорбанк АТБ 1991 йилда ташкил этилган, мамлакат бўйича 153 офисдан иборат йирик тармоққа эга. Банк микромолиялаш кўрсаткичлари бўйича республиканинг энг йирик банклар учлигига киради. Банкинг асосий фаолияти Ўзбекистон иқтисодиётининг реал секторини кредитлаш, рақобатбардош маҳсулотлар ишлаб чиқаришни рағбатлантириш ва янги иш ўринлари яратиш мақсадида техник ва технологик модернизация лойиҳаларини молиялаштиришдан иборат. Банк фаолиятида кичик бизнес ва хусусий тадбиркорликни молиялаштириш устивор аҳамиятга эга.
Реклама ҳуқуқи асосида.
Изоҳ (0)