Reuters агентлигининг фото ва видеооператори Иссам Абдуллоҳнинг Ливан жанубида ишлаётган вақтида ўлими Исроил ва Фаластиннинг ҲАМАС гуруҳи ўртасидаги можаро Ливанга тарқалиб кетиши хавфи катта эканини яққол кўрсатиб турибди. Бу ҳақда БМТ бош котиби Антониу Гутерриш баёнотида таъкидланди.
Қайд этилишича, АҚШ Давлат департаменти “Ливанда журналистларнинг ўлими ҳақидаги хабарлардан хабардор” ва ҳукумат расмийлари ушбу мавзу бўйича маълумот тўплаш устида иш олиб бормоқда.
13 октябрь куни AFP агентлиги Ливандаги турли оммавий ахборот воситалари ходимлари гуруҳининг ўққа тутилиши оқибатида AFP, Al-Jazeera телекомпанияси ва Reuters агентлигининг икки нафардан журналисти яралангани ҳақида хабар берганди. Отишмани айнан ким амалга оширгани айтилмаган.
Антониу Гутерриш 13 октябрь оқшомида Нью-Йоркда журналистлар билан суҳбатда Ғазо сектори аҳолисига зудлик билан инсонпарварлик ёрдамини етказишга чақирди. Шунингдек, у Исроилнинг Ғазо секторининг шимолий қисмларини эвакуация қилиш ҳақидаги чақириғига очиқчасига қарши чиқди. БМТ бош котибига кўра, аҳоли зич жойлашган ҳудуддаги 1,1 миллионга яқин одамга таъсир қиладиган бундай ҳаракат “ўта хавфли ва баъзи ҳолларда имконсиздир”.
Шу билан бирга, Гутерриш ҲАМАС томонидан гаровга олинган барча шахсларни зудлик билан озод қилишга чақирди ва антисемитизм, мусулмонларга қарши мутаассиблик ва фаластинликлар ҳамда Исроил ўртасидаги можаро туфайли юзага келган барча кўринишдаги нафратнинг оғзаки ифодаларини қоралади.
Аввалроқ Исроил ҳарбийлари Ғазо секторидаги Фаластиннинг ҲАМАС ташкилоти нишонларига кенг кўламли ҳужумлар уюштира бошлагани тўғрисида хабар берилганди.
Изоҳ (0)