Тошкент шаҳар Миробод тумани ҳокимлиги ёш боласига қўпол муносабатда бўлган аёл видеосига муносабат билдирди.
Ижтимоий тармоқларда номаълум аёл тахминан икки ёшли фарзандини калтаклагани тасвирланган видео тарқалди. Ушбу ҳолат Миробод тумани ҳокимлиги васийлик ва ҳомийлик органи мутасадди ходимлари ва туман ички ишлар бўлими ходимлари томонидан ўрганилган.
Аниқланишича, фарзандига қўпол муносабатда бўлган фуқаро асли Қашқадарё вилоятидан бўлиб, вақтинча Мирзо Улуғбек туманида рўйхатдан ўтган.
Аёл 13 октябрь куни Миробод тумани “Шароф Рашидов” маҳалласи ҳудудида жойлашган “Алик” номли суратхонага расмга тушиш мақсадида келган. Аёл билан суҳбат натижасида маълум бўлишича, яқинларидан нохуш хабар эшитиб, асабий ҳолатда бўлган вақтида фарзандининг хархашасига жавобан қўпол ҳаракат содир этган.
Аёл ушбу қилмишидан пушаймонлигини, бундай ҳолат авваллари бўлмаганини ва ҳолат бошқа такрорланмаслигини маълум қилган. Ҳозирда ҳолат юзасидан Миробод тумани ИИБ ФМБ ходимлари томонидан суриштирув ишлари олиб борилмоқда.
Март охирларида Тошкент шаҳар Янгиҳаёт туманида спортчи эркак ўз хотини ва боласини аёвсиз калтаклагани ҳақида хабар берилган эди. Кейинроқ мазкур ҳолат бўйича янги тафсилотлар очиқланган. Шунингдек, Қашқадарёда 14 ёшли қизини аёвсиз калтаклаган отага ҳукм ўқилганди.
Изоҳ (0)