Россия президенти Владимир Путин қирғизистонлик ҳамкасби Садир Жапаровни “Шон-шараф” ордени билан тақдирлади. Бу ҳақда Россия ҳукумати сайтида хабар берилган.
Россия раҳбари имзолаган фармонда таъкидланганидек, Жапаров икки давлат ўртасидаги стратегик шериклик ва иттифоқчилик муносабатларини мустаҳкамлашга, шунингдек, Евросиё маконида интеграция жараёнларини ривожлантиришга қўшган катта ҳиссаси учун “Шон-шараф” ордени билан тақдирланган.
Қирғизистон президенти бу мукофотни Қирғизистон—Россия муносабатлари юксак даражасининг эътирофи сифатида қабул қилишини билдирди.
“Мен ушбу мукофотни Қирғизистон—Россия муносабатлари юксак даражасининг эътирофи сифатида қабул қиламан. Мен ЕОИИ, МДҲ ва КХШТ каби бирлашмаларимизнинг интеграцион салоҳиятини ривожлантириш учун бор куч-ғайратимни ишга солишга аҳд қилдим”, — деди Қирғизистон раҳбари.
Россия президенти Владимир Путин бугун, 12-октябр куни Бишкекка келди. Қирғизистонда икки кунлик расмий ташрифи доирасида у МДҲ давлатлари раҳбарлари кенгаши мажлисида иштирок этади ва бир қатор икки томонлама учрашувлар ўтказади.
Изоҳ (0)