ҲАМАС кучлари ва Исроил армияси ўртасида 7-октябр куни эрталаб бошланган жанглар учинчи кун ҳам давом этмоқда. The Times оf Israel нашри Исроил мудофаа кучлари матбуот хизматига таяниб, Ғазо сектори билан чегарадаги камида олтита шаҳар ва ҳудудларда жанглар кетаётгани ҳақида хабар берди. Исроил томони ҲАМАСнинг 400 дан ортиқ жангчисини ўлдирганини даъво қилмоқда. Исроил армиясидаги йўқотишлар ошкор қилинмаган.
9-октябрга ўтар кечаси Исроил мудофаа кучлари Ғазо секторига зарба беришда давом этди – ҲАМАС ва “Исломий жиҳод”нинг 500 дан ортиқ объектларига, жумладан, саккизта қўмондонлик марказига ҳужум қилинди, деди Исроил ҳарбийлари. Шунингдек, улар ҲАМАСнинг юқори мартабали аъзосини қўлга олишга муваффақ бўлгани айтилди, аммо тафсилотлар очиқланмади.
ҲАМАС Исроилнинг Ашкелон шаҳрига оммавий ракета ҳужуми уюштирганини маълум қилди. CNN маълумотларига кўра, ҲАМАС Ашкелонга 100 га яқин ракета отганини айтмоқда. ОАВ ёзишича, ҳужум уч қаватли бинога зарар етказган, қурбонлар бор. ҲАМАС Тель-Авивдаги Бен Гурион аэропорти томонга ҳам ракета отган.
Исроил мудофаа кучлари вакили Даниэль Хагарининг айтишича, “Исроил армияси ҲАМАС эгаллаб олган барча ҳудудларни ўз назоратига қайтарди”. Армия юз минглаб заҳирадаги аскарларни урушга жалб қилмоқда. Шу билан бирга, Haaretz нашрининг ёзишича, халқаро авиакомпанияларнинг Исроилга парвозларни тўхтатиш қарори туфайли хориждаги кўплаб заҳирадаги аскарлар чартер рейсларида мамлакатга қайтишни ташкил қилиш учун WhatsApp гуруҳларини яратган, бошқалари эса Исроилнинг Эл Ал авиакомпанияси билан музокаралар олиб боришга уринмоқда. Кейинроқ Исроил армияси 48 соат ичида 300 минг заҳирадаги аскарни сафарбар қилгани айтилди.
Исроил 48 соат ичида Ғазо секторида қуруқликдаги операцияни бошлаши мумкин, деб ёзади Тhе Washington Post Америка расмийларига таяниб. Нашр хабарига кўра, Исроил АҚШдан Ливан ҳақида, у ерда фаолият юритаётган “Ҳизбуллоҳ” ва бошқа гуруҳлар бўйича разведка маълумотларини ҳам сўраган.
9-октябр куни эрталабки ҳолатга кўра, ҳужумларда Исроилда 700 дан ортиқ одам ҳалок бўлган, 2 382 киши яраланган. Исроил жанубидаги Ғазо сектори билан чегарадош Киббутс Реим ҳудудидан мусиқа фестивалига уюштирилган ҳужум оқибатида ҳалок бўлган камида 260 кишининг жасади топилган. Реимда ҳалок бўлганлар умумий статистикага киритилганми ёки йўқ, ҳозирча номаълум.
Al-Jazeera телеканали Фаластин соғлиқни сақлаш идоралари вакилларига таяниб, ҳарбий ҳаракатлар бошланганидан буён Ғазо секторида 493 киши ҳалок бўлгани, 2750 дан ортиқ фаластинлик яралангани ҳақида хабар берди.
ҲАМАС 130 дан ортиқ одамни гаровда ушлаб турганини маълум қилди. 8-октябр куни кечқурун ҳаракат вакили Мусо Абу Марзук ҲАМАС Исроилга ҳужум пайтида 100 дан ортиқ одамни гаровга олганини айтди. Фаластиннинг “Ислом жиҳоди” гуруҳи раҳбари Зиёд ан-Наҳала эса ўз жангчилари 30 га яқин исроилликни асирга олганини айтди. У гаровга олинганлар орасида бошқа мамлакат фуқаролари бўлса, улар фаластинлик маҳбуслар Исроил қамоқхонасидан озод этилганидан кейингина уйга қайтишини таъкидлади.
8-октябр куни БМТ Хавфсизлик Кенгаши ҲАМАСнинг Исроилга ҳужуми муносабати билан фавқулодда йиғилиш ўтказди. Ёпиқ йиғилишдан сўнг Хавфсизлик кенгаши ҳеч қандай баёнот қабул қилмади, чунки кенгаш аъзоларининг ҳаммаси ҳам ҲАМАСнинг Исроилга ҳужумини қораламаган, деб ёзади CNN.
Изоҳ (0)