Жаҳонгир Отажонов ҳамкасбларидан нафақат ижоди, балки феъл-атвори билан ҳам тубдан фарқ қилади. Унинг ўз дунёси бор, хушига келган ишни қилишдан ҳам тап тортмайди. Машҳур Отажоновлар сулоласининг вакили бўлган Жаҳонгир Отажоновнинг санъаткор бўлиши янгилик бўлмаган. Чунки бу авлод вакиллари орасида хонанда ва созандалар ниҳоятда кўп. Аммо Жаҳонгир Отажоновнинг санъат вакили бўлиши ва халқ орасида ўз мухлисларини топиши осон кечмаган.

“8-синфдан кейин ўқимасликка мажбур бўлганман”

Жаҳонгир Отажонов 1978 йилнинг 29-сентябр куни Урганч шаҳрида зиёли оилада дунёга келган. Отаси Хоразмнинг машҳур санъаткорларидан бири бўлган. Амакиси Ортиқ Отажонов эса бутун республикага машҳур ҳофиз бўлгани ҳеч кимга сир эмас.

— Мен ўзига тўқ оилада дунёга келганман. Отам санъаткор эди, кўп тўйларга борарди. Биз фарзандларимизни ҳозир қанақа ўстираётган бўлсак, ўзимиз ҳам шундай тўқ ўсганмиз. Шундай синов келдики, оиламиз моддий жиҳатдан қийналиб қолди. Шу сабаб 8-синфдан кейин ўқимасликка мажбур бўлдик. Бозорда савдо-сотиқ билан шуғулландик, — дейди Жаҳонгир Отажонов.

“Анча вақт ижара уйда яшашимга тўғри келган”

Хонанда болаликдан ижодга қизиққан, унда нафақат ижрочилик балки қўшиқ яратиш қобилияти ҳам бўлган. У жуда кичиклигидан бошлаб, отаси билан тўй хизматларига боради. У илк иқтидорини ана шундай давраларда намойиш этган. Мактабни тамомлаб, Ўзбекистон давлат консерваториясига ўқишга қабул қилинади. Аммо шунда ҳам молиявий қийинчиликлар оилани тарк этмаган эди.

— Тошкентда уйимиз йўқ эди, тоғам уйини бизга бериб, бир тийин ҳам ҳақ олмаганди. 22 ёшимда машҳурликка эришиб, кўпчилик тўй хизматларига айтиш учун уйимизга келишарди. Уйимиз оддий бўлгани учун уни таъмирлатишга қарор қилганман. Икки қаватли уйни қуриш учун 2000 йили 105 минг АҚШ доллари сарфлаганмиз. Таъмирлаш ишларини якунлагандан кейин тоғам уй пулини сўраган. Маҳалладаги уйлар 10 сўм бўлса, шу пулни бераман, десам рози бўлмаган. Вазият шу қадар жиддийлашдики, тоғам мени судга берди. Уй унинг номида бўлгани учун суд у томонга қарор чиқарди. Тоғам “Истасанг, қурган уйингни олиб кет”, деди. Ўшанда жаҳл билан Чорсудан 30-40 та уста йигитларни олиб келиб, уйни текислаб буздуриб ташлаганман. Ўшанда тоғамдан қаттиқ ранжигандим. Ҳасанбойдаги уй қурилмагани учун анча вақт ижара уйда яшашимга тўғри келди. Ҳозир тоғам билан бўлган низоларни унутиб юборганман. Яратган менга бу воқеадан кейин жуда кўп уйларни берди, — дейди хонанда Жаҳонгир Отажонов.

“Машина ҳужжатларим билан ёниб кетган”

Жаҳонгир Отажонов ҳаётида зиддиятли ва мураккаб воқеалар жуда кўп бўлган. Ҳатто, у интервьюларининг бирида тўйдан қайтаётганида янги машинаси ёниб кетгани, пулсиз ва ҳужжатларсиз йўлда қолиб кетгани ҳақида ҳам сўзлаб берган.

— Жуда ёмон вазиятда қолганмиз. Катта йўлда машинамиз бирдан тутаб, бир неча дақиқада ёниб кетган. Машина ҳужжатлари ва поспортимни олишга ҳам улгурмаганмиз. Пулсиз қолиб кетганимизда раҳматли Азиза Ниёзметова жонимизга оро кирганди. Иномарка машина бир неча дақиқада кулга айланган, — дейди хонанда Жаҳонгир Отажонов.

“Машинамни ўғирлаб кетишди”

Анча йилдан кейин эса яна бир машина билан боғлиқ унитилмас воқеа содир бўлган. Бу сафар Истанбул шаҳрида хонанданинг шахсий автомобилини ўғирлаб кетишган.

— Кулгим ҳам келади, Истанбулда менинг машинамни ўғирлаб кетишибди. Одам ҳайрон бўлади. Ҳаёт қизиқ экан, кимдир машинангни ўғирлаб кетса, кимдир уйингни “ухлатиб” кетади, одам ўрганиб ҳам қолар экан бунақа ҳаётга, — дейди хонанда.

Жарроҳлик амалиётини бошдан кечирди

Жаҳонгир Отажонов “Аразламанг”, “Оқ кабутар” ва “Доғман” каби қўшиқлари билан мухлислар қалбини забт этади. 2018 йили эса “Қадди баланд” қўшиғи билан қайтадан порлаб чиққандек бўлди. Мухлислари сони кескин ортиб, унинг ижодига қизиқиш янада ўсди.

“Мен санъатдан кетдим”

2020 йилининг декабрь ойида Жаҳонгир Отажонов ижодни бутунлай тарк этганини маълум қилиб, YouTube тармоғидаги барча қўшиқларини ўчиртириб ташлаганди.

— Assalomу алайкум, азиз дўстлар, мана ва ниҳоят, Аллоҳни иродаси билан ўзимни бир-икки йилдан бери қийнаб келаётган саволларга ушбу дақиқаларда жавоб топдим, деб ўйлайман. Иншаллоҳ, ўзим яхши кўрган, мени шунча даражага етказган, халқимиз орасида озми-кўпми обрў-эътибор қозонишимга сабабчи бўлган мусиқачилик касбимдан Аллоҳ учун шариатимизга тўғри келмагани учун воз кечишга журъат қилдим.

Ҳаммаларингга каттакон раҳмат, йиллар давомида мени олқишлаб, қўшиқларимни эшитиб, шунчалик ҳурмат-эътибор қилганинглар учун, ҳаммаларингдан Аллоҳ рози бўлсин! Ва шу қаторда мендан хафа бўлган, саҳна ишларимдан норози бўлган дўстларимизга, юртдошларимизга ҳам соғлик-саломатлик тилайман, мендан рози бўлишликларини сўраб қоламан, Аллоҳ барчадан рози бўлсин. Бугундан бошлаб менга мусиқачилик касбим бўйича мурожаат қилманглар, 1 январгача олинган тўй ва концертларимиз бор, олдиндан олинган “заклад”ларни бемалол мурожаат қилиб қайтариб олишинглар мумкин. Мен у саҳналарда иштирок эта олмайман, Аллоҳ менга бу касб билан видолашишликни насиб қилди. Ўзи хайрли қилган бўлсин, барчангларга икки дунё саодатини берсин. Мухлисларимдан бир илтимосим бор, сизлардан илтимос, менинг мусиқаларимни YouTube дан ўчириб ташлашни сўрайман. Зотан, мусиқа шариатда номақбул ҳисобланаркан, сизларнинг ҳам гуноҳкор бўлишингларга сабабчи бўлишни хоҳламайман. Соғ-саломат бўлинглар!, — деб ёзганди хонанда.

Аммо хонанданинг бу қарори узоқ вақтга чўзилмади. У санъатни тарк этганидан 6 ой ўтиб, “Ғийбатчиларга” номли қўшиқни яратганини маълум қилди. Бу премьерадан сўнг Instagram саҳифасига тўй-хизматларида аввалгидек жонбозлик кўрсатаётгани ҳақидаги видеоларни жойлади.

Сиёсатдан узоқ юришга қарор қилди

Унинг санъатни тарк этиши, президентлик сайловига номзодини қўймоқчи эканлиги ва яна ижодга қайтгани билан боғлиқ кутилмаган қарорлари узоқ вақт муҳокамаларга сабаб бўлди.



Ундан кейин ота-онасини ўйлаб, сиёсатдан узоқ юришга қарор қилганлигини маълум қилди.

Нима учун жавобгарликка тортилган

Хонанда нафақат ижоди, балки ҳаёт тарзи ҳам бошқаларникига ўхшамайди. 2021 йили у ИИВ ходимларини ҳақорат қилгани учун Маъмурий жавобгарлик тўғрисидаги кодекснинг 41-моддаси (ҳақорат қилиш)да кўрсатилган ҳуқуқбузарлик аломатлари мавжудлиги сабабли тўпланган ҳужжатлар 2021 йил 23 июлда жиноят ишлари бўйича Шайхонтоҳур тумани судига тақдим этилган.

Жаҳонгир Отажонов Ички ишлар вазирлиги тизими ходимларини ҳақорат қилган видеомурожаатини жойлаштириб, ходимларнинг шаъни ва қадр-қимматини беодоблик билан қасддан таҳқирлаганликда айбланган. Орадан бир неча ой ўтиб эса у уч нафар вояга етмаган фарзандларига алимент тўламаганлигини учун Урганч аэропортидан Истанбулга учолмаганди.

Жаҳонгир Отажонов зўр ижодкор ва серфарзанд ота

Хонанда Жаҳонгир Отажоновнинг етти нафар фарзанди борлигини кўпчилик билмаса керак. Аммо бу ҳақда унинг ўзи Instagram саҳифаси орқали бир неча марта маълум қилган ва ўғил-қизлари билан тушган суратларини тармоқларга тез-тез жойлаб туради. Қўшиқчининг Мумтоза, Муаммар, Муҳаммад, Муайяд, Ясира, Ясмина, Лийнат исмли фарзандлари бор.