Ўзбекистонда ўртача ойлик маош миқдори 4 минг доллар бўлган соҳа ҳақида маълумот берилди

Ўзбекистонда ахборот коммуникация технологиялари соҳасидаги ўртача ойлик маош миқдори — 4 минг доллар атрофида. 

Ёшларнинг АКТга бўлган қизиқишини ошириш мамлакат миқёсидаги вазифаларни ечишга қандай ҳисса қўшади?

Ахборот коммуникация технологиялари — бугунги куннинг энг сердаромад соҳаларидан бири. Ўзбекистонда ушбу соҳадаги ўртача ойлик маош миқдори — 4 минг доллар атрофида, дунё бозорида эса 100-150 минг доллар атрофида баҳоланади. Бу — ёшлар АКТни ўрганиши учун энг катта мотивация. Ўз навбатида, давлат ҳам ёшларнинг ушбу замонавий касбни мукаммал эгаллашидан манфаатдор — дунёнинг энг илғор кашфиёт ва ишланмалари айнан ахборот технологиялари соҳасида яратилмоқда. Шу боис соҳани ўрганмоқчи бўлган ёшлар давлат томонидан тўлиқ қўллаб-қувватланяпти.

Компьютер харид қилиш учун кафиллик

“Бир миллион дастурчи” лойиҳаси доирасида ўқув курсларини муваффақиятли тамомлаган ёшларга, шунингдек, IT-парк резидентининг ўқувчиси ёки битирувчиси бўлган ёшларга истеъмол кредити орқали компьютер харид қилиш учун кафиллик бериш ҳамда мазкур кредитларнинг фоиз тўловларини Ёшлар ишлари агентлиги томонидан компенсация қилиш йўлга қўйилди. 

Бу — ўз компьютерига эга бўлиш истагидаги ёшлар учун муҳим имконият. Айниқса, ҳудудларда қизиқувчан, билимли ёшлар кўп, истеъмол кредитлари фоизи улар учун қимматлик қилиши ёки тўлов қобилиятидан шубҳаланган банклар рад жавобини бериши мумкин.  Шундай пайтда Ёшлар иттифоқининг кафиллиги ҳамда фоизларини қоплаб бериши асқотади. Ушбу лойиҳа доирасида ўқув курсларини муваффақиятли тугатган 165 минг нафардан ортиқ ёшлар ариза топширган ва шундан 48 минг нафар ёшларга компьютер харидлари учун 357,5 миллиард сўм истеъмол кредитлари ажратилди ва уларнинг фоиз тўловлари учун 35,2 миллиард сўм йўналтирилди.

“Бир миллион дастурчи”

Бугунги кунда “Бир миллион дастурчи” лойиҳаси доирасида таълим олаётганлар сони 2 миллион 503 минг нафар (2023 йил бошидан 480 минг нафар)дан ошди. Шунингдек, 1 миллион 175 минг 933 нафари битирувчи сертификатини қўлга кирит, шундан, 646 минг 763 нафари (55%) эркаклар, 529 минг 170 нафари (45%) аёллар. 

Дастурчи бўлмоқчи бўлган ёшлар учун яна бир имконият яратилган — 2022-2024 йиллар давомида “Astrum” IT академиясида ўқув курсларида таҳсил олиш учун 4 000 нафар ёшга Алоқа банк томонидан БҲМнинг 75 бараваридан ошмаган 3 йилгача (6 ой имтиёзли муддати билан) таълим кредити ажратиш ҳамда мазкур кредитларнинг фоиз тўловларини Ёшлар ишлари агентлиги томонидан компенсация қилиш йўлга қўйилди.

АКТ соҳасининг ривожланиши мамлакатнинг иқтисодий ўсиши ва рақобатбардошлигини оширилишига катта ҳисса кўшади. Ушбу йўналишда ёшларни қўллаб-қувватлаш инновацияларни ишлаб чиқиш, янги иш ўринлари яратиш ва хорижий сармояларни жалб этишга хизмат қилади. Давлат дастурчиликка қизиққан, IT соҳасини ўрганмоқчи бўлган ёшларни қўллаб-қувватлаётгани — келажак учун сармоя. Бу ёшлар ўзларига сарфланаётган маблағларни ортиғи билан оқлашади. Технологияларни ўрганган ёшлар давлат инновацион ривожланишига ўзининг муносиб ҳиссасини қўшади.