Тошкентнинг Сергели тумани “Қурувчилар” даҳасида жойлашган омборхонада юз берган портлаш юзасидан ҳукумат комиссияси тузилди.
Бош вазир матбуот котиби Бекзод Ҳидоятовнинг маълум қилишича ҳукумат комиссияси Шавкат Мирзиёев топшириғига асосан Очилбой Раматов бошчилигида тузилди.
Комиссия содир бўлган фавқулодда ҳодисани ўрганиш, кўрилган талафотларни бартараф этиш ва жабрланганларга ёрдам кўрсатиш бўйича иш олиб боради. Комиссия томонидан ҳудудда олиб борилаётган ишлар юзасидан ахборот бериб борилади.
Тошкент шаҳри Сергели туманидаги “Қурувчилар” даҳасида Inter Logistics МЧЖга қарашли омборхонада кучли портлаш ва ёнғин 28-сентябр куни тунда содир бўлганди. Ҳодиса акс этган тасвирлар ижтимоий тармоқларда кенг тарқалди.
ФВВ берган маълумотга кўра, соат 02:43 да ёнғин содир бўлаётгани тўғрисида ФВБга хабар тушган. Шунга кўра, 16 та ёнғин-қутқарув экипажи ва 3 та автонарвон соат 02:48 да ҳодиса рўй берган ҳудудга етиб борган. Ёнғинни ўчириш ишлари амалга оширилган.
Соғлиқни сақлаш вазирлигига кўра, ушбу ҳодиса оқибатида жабрланганларнинг умумий сони 163 нафарни ташкил этмоқда. Шундан жами 24 нафари Республика шошилинч тиббий ёрдам илмий маркази ва унинг Тошкент вилояти филиали, Тошкент шаҳар тез тиббий ёрдам шифохонаси, 1-сонли Республика ва 1-сонли шаҳар клиник шифохоналари ҳамда 1-сонли шаҳар туғуруқхонасига ётқизилган. Қолган 138 нафар жабрланган аҳоли вакилининг саломатлиги яхши бўлгани учун амбулатор тиббий ёрдам кўрсатилиб, уйига жавоб берилган.
Ҳодиса оқибатида 2006 йилда туғилган бир нафар ўсмир бола воқеа жойида вафот этган ва шифохонага тириклик аломатлари бўлмаган ҳолда олиб келинган.
Изоҳ (0)