Ўзбекистонда хизмат кўрсатган артист Милена Мадмусаева нафақат опера, балки эстрада йўналишидаги қўшиқлари билан ҳам мухлислар эътиборига тушган. Латофатли хонанда ижодда осонликча муваффақиятга эришмаган.
“Кўпчилик миллатимга қизиқади”
.jpg)
— Асли Навоийда туғилганман, аммо 10 ойлик чақалоқлигимда ота-онам билан Фарғонага кўчиб ўтганмиз. Шу боис болалигим Фарғона билан боғлиқ. Кўпчилик инсонлар қайси миллат вакиласи эканлигимга қизиқишади. Онам эрон миллатига мансуб, аммо Тожикистонда дунёга келган. Отам эса қирғизистонлик тожик. Уларнинг танишуви жуда қизиқ кечган. Улар Россиянинг Самара шаҳрида бирга ўқишган ва оила қургач, йўлланма асосида ишлаш учун Навиойга келишган. Оилада уч қиз ва бир ўғил фарзанд туғилган. Сингилларимнинг бири рассом, иккинчиси эса архитектор. Айнан хонанда бўлишмаса ҳам, ижод қилишади, — дейди Милена Мадмусаева.
“Бўлди, энди рақс тушмайман”
Милена — славян тилида “нозик” ва “латофатли” деган маъноларни англатади. Хонанданинг оиласида санъаткорлар бўлмаса-да, у болаликдан рақс тушишга қизиқади. Аммо биргина муваффақиятсизлик сабаб рақсдан кўнгли совийди.
— Онамнинг айтишича, уч ёшимда бувимнинг уйидан оқадиган ариқнинг ёнида соатлаб ўтиришни яхши кўрган эканман. Онам “Бошингдан офтоб ўтади”, деб уйга олиб кирмоқчи бўлса, “Сув қўшиқ айтяпти”, деб кетишни истамаган эканман. Рақсга тушишни ёқтирганим учун онам рақс тўгарагига олиб борган. Айтишларича, жуда чиройли рақс тушган эканман. Аммо мактабимизда ўтказилган кўрик танловда иккинчи ўринни олгандан кейин “Бўлди, энди рақс тушмайман”, деганман. Мактабда ҳамиша биринчиликка интиладиган лидер қиз эдим. Сўзимнинг устидан чиқиб, кейин умуман рақс тушмай қўйганман, — дейди хонанда.
Халқаро танловларда тажриба орттирди
2007 йилда Милена ёш ижрочилар ўртасидаги республика танловида иштирок этиб, тенгдошларидан катта устунлик билан биринчи ўринни эгаллайди. Шу йили Тошкент давлат консерваториясининг академик хонандалик факультетига ўқишга киради. У ўқиш билан бирга кўплаб халқаро танлов ва фестивалларда қатнашиб, тажриба орттиради. Милена Мадмусаева Франция, Испания ва Италияда ўтказилган халқаро танловларда иштирок этиб, хорижлик опера усталарининг назарига тушган.
“Овозим Владимир Путинга маъқул келди”
Милена Мадмусаева Ўзбекистон давлат Консерваториясини тамомлаб, “Ўзбекнаво” эстрада бирлашмасига хонанда сифатида ишга қабул қилинади. Шу боис у давлат тадбирларида фаол иштирок этади.
— 2008 йилдан буён давлат тадбирларида фаол бўлишга ҳамиша интилганман. 2016 йили 16 та давлат президентлари иштирокида ШҲТ саммити доирасида ўтказилган концертларда фаол иштирок этдим. Хонандалар ҳар бир давлат номидан қўшиқлар ижро этиши керак эди. Мен Россия номидан рус тилида қўшиқ айтдим. Овозим Владимир Путинга ҳам маъқул келиб, мендан маъмнун бўлишди. Ўша йили “Ўзбекистонда хизмат кўрсатган артист” унвонини беришди. Аслида унвон учун ҳеч қандай ҳужжат топширмагандим, бу мен учун кутилмаган янгилик бўлди, — дейди хонанда Милена Мадмусаева.
“Юзимнинг бир томони қийшайиб қолган”
Милена Мадмусаева 2016 йилнинг 25 апрелида ўз продюсери Абдуҳамид Халиловга турмушга чиққан, жуфтлик 2017 йилнинг 1 апрелида қиз фарзандли бўлган эди. Аммо оила узоқ вақт бирга яшамайди. Орадан анча вақт ўтиб хонанда турмуш ўртоғи билан нима мақсадда ажрашганини маълум қилди.
— Янги келин бўлиб тушганимда қайнонам ота-онангизни унутасиз, деб айтганлар. Телефонларимни олиб қўйишган. Ҳафтада бир марта, жума куни турмуш ўртоғимнинг олдиларида 2 дақиқа ота-онам билан гаплашиш ҳуқуқи берилган эди. Ҳалигача ҳайрон қоламан, нима сабабдан қайнонам менга шу гапларни айтган. Бир куни ота-онамни соғиниб йиғлаб ўтирсам, қайнонам келиб, бўлди, мен ҳам шунақа келин бўлганман. Келинлик шунақа. Ота-онангизни унутинг, улардан воз кечинг, деганлар. Мен қайнонамнинг кўзларига ҳеч қачон тик боқмаганман. Уларга онам ўргатганларидек яхши муомалада бўлардим, сочларини ювиб қўярдим. Тўй-ҳашамларга борар бўлсалар, тирноқларини маникюр қилиб, тақинчоқларимни бериб турардим. Юзларига ниқоблар қилиб қўярдим. Уларни онамдек яхши кўришга ҳаракат қилганман. Лекин мен улар учун бегона бўлганман. Ҳаттоки турмуш ўртоғим учун ҳам бегона бўлганман. Мен у ерда ўзимни худди бўрилар орасига тушиб қолгандек сезардим. 10 ой чидаганман, турмушим бузилмаслигига ҳаракат қилганман. Бир куни олти ойлик ҳомиладорман, соат кечаси 12:00, ота-онамни соғиниб йиғлаганман, турмуш ўртоғимга эртага онамга телефон қилиб беринг, деганман. Шунда улар “Сенга неча марта айтиш керак? Ота-онанг ҳақида умуман гапирма! Умуман, мен гапираётганимда тик туриб эшит”, деб турғизиб қўйганлар. Шунда ҳаво етмай, мазам бўлмай, кўчага чиқиб кетганман. Уч соат кўчада юрганман. Қайтиб келиб, юзимни ювсам, юзимнинг бир томони қийшайиб қолган бўлган. Фарзандим учун қўрқиб кетганман. Эрталаб тонг отиши билан машинамга ўтириб, ойимларнинг уйига кетганман, — дейди Милена кўз ёшларини тия олмай.
“Ҳаётимда тақиқлар бошланган”
Миленанинг айтишича, турмуш ўртоғи икки кундан сўнг ундан кечирим сўраб, уйига олиб кетади. Шу воқеадан кейин хонандага ота-онаси билан хоҳлаган вақтида телефон орқали суҳбатлашишига рухсат беришган.
— Фарзандим туғилганидан сўнг яна можаролар, тақиқлар бошланган. Онамларни гапирсам, жаҳллари чиқиб кетарди. На турмуш ўртоққа кераксан, на ота-онасига, на қайнука, қайнсингилга кераксан. Фақат қулликка кераксан, — дейди хонанда.
“Қизим отасини танимайди”
Милена мана шундай воқеа-ҳодисалардан сўнг ота-онасидан уни олиб кетишларини сўрайди. Ота-онасиникида бир ой яшаганидан сўнг у турмуш ўртоғига қўнғироқ қилади.
— Бу бизнинг ўртамиздаги муносабатимиз. Фарзандингиз сизнинг фарзандингиз. Хоҳлаган пайтингизда келиб кўришингиз мумкин, деб айтганман. Шунда турмуш ўртоғим у қиз ўша хонадонда катта бўлар экан, у менга бегона, деган эдилар. Мана, қизим улғайиб қолган, лекин турмуш ўртоғим бирор марта уни кўришга келмаган, қизим уни танимайди, — дейди Милена Мадмусаева.
“Қалбимни қаттиқ яралашган”
Хонанда шахсий ҳаётидаги омадсизликлар сабаб бир муддат тушкунликка тушиб қолгани ҳақида сўзлаб берди.
— Аллоҳим аёлни жуда ҳам кучли қилиб яратган. Ҳаёт синовлари бизни яна ҳам кучли қилади. Лекин баъзан шундай пайтлар бўлади, кучли бўлишдан чарчайсиз. Лекин қалбимизда умид учқуни ҳамиша бор. Шу умид олдинга, гўзал, ўзингиз хоҳлагандек ҳаётга юришга ундайди. Инсон ҳаётини ҳеч қачон ўйинчоқ қилмаслик керак. Менинг ҳаётимда шунга ўхшаш нарса бўлган, турмушимда... Жуда ҳам қалбимни қаттиқ яралашган. Майли, у инсонларга омад тилайман. Лекин мен оилага қадам қўяётган йигитларимизга шуни айтардимки, агар шу аёлни бахтли қилиб, оилани, рўзғорни ушлаш, фарзандларингни ҳимоя қилиш қўлларингдан келса, шу ҳаётга қадам қўйинглар. Агар қўлларингдан келмаса, бир қизнинг умрини бадном қилиш керак эмас.
— Ўша оиламдан кетишим билан ёлғиз қолсам, нимадир бўлишини билиб, магистратурага ўқишга топширдим. Ўшанда қизалоғим уч ойлик эди. Ва ўзим учун созандалар йиғиш учун эълон бердим. Ўзимнинг санъатимни янада давом эттириш учун ҳаракат қилдим. Ота-онам кўмаги, далдаси бўлмаганида, менга жуда оғир бўлган бўларди, — дейди Милена ҳаёт синовларидан қандай ўтгани ҳақида.
“Фалончининг яқини эмасман”
Хонанда ажримдан сўнг оила қургани йўқ. У бор эътиборини ижодга қаратяпти. Сентябр ойида илк яккахон концерт дастурини тақдим этди. Хўш, ҳамиша қимматбаҳо либосларда давраларга кириб борадиган Милена нималардан ранжийди?
— Айрим “санъаткорлар” сабаб асл ижодкорларнинг ҳам қадр-қиммати тушаётгандек туюлади. Улар билан асл санъаткорларни фарқлаш керак. Улар санъатнинг номига доғ туширишяпти. Қимматбаҳо кийим кияди, дегани бу фалончининг яқини дегани эмас. Чиройли кийинишга ҳаракат қиламан, аммо ҳаммасига санъатдан топганларим сабаб эришганман, — дейди хонанда.
Изоҳ (0)